انطلاق تصوير فيلم 60 جنية لـ عمرو سلامة

انطلق تصوير فيلم 60 جنيه للمخرج عمرو سلامة، و المستوحى من أغنية مطرب الراب زياد ظاظا.

تحيا مصر يرصد بدء تصوير فيلم 60 جنيه. 

فيلم 60 جنيه 

ونشر عمرو سلامة عبر حسابه الرسمي بموقع التواصل الاجتماع فيسبوك، صورة من كواليس تصوير الفيلم، وعلق عليه قائلًا: بداية تصوير الفيلم الدرامي القصير 60 جنيه، مشروع مليء بالشغف والتجريب، مستوحى من أغنية لـ زياد ظاظا.

من جانبه، كان كتب عمرو سلامة منشور عبر حسابه بموقع التواصل الاجتماعي فيسبوك وعلق: لو قسمت أكبر ايراد لفيلم مصري على متوسط سعر التذكرة هتلاقي عدد اللي دخله ٢ مليون شخص.. لو ضربت الرقم ده حتى في ٣، هيطلع ٦ مليون شخص، ستة مليون بالكثير قوي من ١١٠ مليون مصري.

عمرو سلامة يتحدث عن أسعار تذاكر السينما

وتابع: ٥٪؜ من المصريين فقط قادرين يروحوا السينما ودي تقديرات حتى متفائلة جدا، اعتقد الأرقام الحقيقية أقل من كده واعتقد النسبة هتقل بسبب الظروف الاقتصادية الحالية، اصل مين الاسرة اللي قادرة تصرف بمتوسط ٥٠٠ جنيه في ساعتين؟.

وأضاف: سينمات وسط البلد والاقاليم اللي كانت تقدر تنجح فيلم زمان، وصنعت نجوم، دلوقتي ماتقدرش تنجح فيلم ولا تصنع النجم الشعبي، لان سعر تذكرتها دلوقتي لا يقارن بسعر التذكرة في المولات.

واستكمل: لذا تحولت السينما دلوقتي لسينما الأغنياء والميسرين، جمهور المولات فقط دلوقتي اللي يقدر ينجح فيلم أو يخليه يفشل، وده غير شكل السينما، هل غيرها للأفضل أو الأسوأ؟ سؤال صعب نعرف اجابته لكن من المؤكد إنه بيقتل سينما الناس، سينما الغلابة، سينما هموم المجتمع، السينما السياسية، السينما الاجتماعية، السينما المتعاطفة مع مشاكل الانسان البسيط.

تصريحات عمرو سلامة 

وتسأل عمرو سلامة: هل لو نزل النهاردة فيلم من أفلام عاطف الطيب، بشير الديك، محسن زايد، وحيد حامد، فيلم زي الكيت كات، فيلم الإرهاب والكباب، فيلم سواق الاتوبيس، هل أي فيلم من دول هينجح ويشتغل في سينما المولات؟ هيعرف المنتج يبيع توزيعه لسينمات الخليج ويقبل عليها الموزع الخارجي اللي أصبحوا مصدر مالي مهم لنجاح أي فيلم؟ السؤال الأهم، الأفلام ديه أصلا هتلاقي اللي ينتجها النهاردة؟

واختتم عمرو سلامة: هل البسطاء عندهم فن يمثلهم؟ هل لهذا السبب اتجهوا للسوشيال ميديا اللي بيلاقوا فيها المحتوى اللي مصنوع من ناس شبههم واللي بيمثلهم؟ هل اصبح هناك عالمين منفصلين تماما لكل عالم فنه ووسيطه وسلوك مشاهدته؟.. أسئلة أعتقد إنها تستحق التأمل.