سارة نخلة ردًا على هجوم دعاء فاروق: مهاجمتيش الفنان اللي أعلن أنه عمل مساكنة ليه

خرجت الفنانة سارة نخلة، للرد على الهجوم الذي شنته الإعلامية دعاء فاروق  بعد حديثها عن المساكنة مع الفنانة بسنت النبراوي.

تحيا مصر يرصد رد سارة نخلة على هجوم دعاء فاروق. 

سارة نخلة تفتح النار على دعاء فاروق

وقالت سارة نخلة خلال برنامجها “Face off”  الذي تقدمه على شاشة “هي”: حصل قلق بسبب حلقة الأسبوع اللي فات، رغم إننا أخدنا رأي الدين وتوصلنا في نهاية الحلقة إن المساكنة حرام، والمجتمع بيرفضها والعادات والتقاليد.

وتابعت: ولكن في سيدة فاضلة طلعت عايزة تهاجم من غير ما تشوف الحلقة ولا أي حاجة من غير ما تفهم كنا بنتكلم في ايه، قررت تدخل تهاجم وبس، واحنا مش أول ناس تهاجمنا، وأنا على دماغي النقد البناء، ولكن كان لازم تردي بأدب واحترام، ولكن كنتي بتناقضي نفسك وأنتِ بتكلميني، طلعتي قولتي يعني إيه بتتناولوا حوار المساكنة كدا عادي، أنا مصحتش من النوم قررت أتكلم عن المساكنة، وعلى الرغم في فنان مصري طلع قال أنا عملت المساكنة ليه مهاجمتيش الفنان ده أو خفتي على الأطفال اللي بيتفرجوا عليه.

وأضافت: الناس افتكرت إن في حاجة شخصية بيني وبين حضرتك ولكن مافيش سابق معرفة بينا وبين بعض ويمكن اللي بتقدميه مش من اهتمامي يعني البازار والهدوم هكذا، ومش فاهمة طريقة ردك يعني إيه تقولي متضايقة من لفظ المساكنة عشان خوفًا على تساؤلات الأطفال ولكن قولتي في نفس الفيديو لفظ دعارة عادي؟ على الأقل لو ابني سألني هقوله ده حرام وهكذا، ولكن قولتي دعارة يعني إزاي أقول لطفل دعارة؟

هجوم دعاء فاروق على بسنت النبراوي وسارة نخلة

وكانت نشرت دعاء فاروق، مقطع فيديو، عبر حسابها الرسمي بموقع تبادل الصور والفيديوهات القصيرة إنستجرام، قالت فيه: ازاى يناقش موضوع المُساكنة، لا وبنجيب الشباب والبنات في مصر ونسألهم عن المساكنة.. تحب تعمل مساكنة ولا لأ.

وتابعت: يعني أنت بتجيب بنتك وتسألها تحبي تزني، أنتوا إزاي بتناقشوا موضوع الزنا، ملناش دعوة في اتنين عملوا كده في مكان لا يناسب عاداتنا وتقاليدنا ولا حياتنا. 

أزمة مناقشة المساكنة 

وأضافت: بعدين ألاقي بنت تتسأل عن المساكنة فتقول لو مش حرام آه هعمل المساكنة، غيري كلمة المساكنة وبدليها بزنا.. حضرتك تحبي تزني قبل الزواج، والبنات تقول  آه لو مش حرام، يعني إحنا ممكن الصبح نغير اسم بيوت الدعارة بـ  بيوت السعادة  وننزل نسأل الطلاب تحب تروح بيت السعادة ويقولوا آه.