ماجدة خير الله عن حلا شيحة: محدودة الموهبة وبتهين الفن

خرجت الناقدة الفنية ماجدة خير الله، لتعلق على تصريحات الفنان أشرف زكي نقيب المهن التمثيلية بقرار عودة الفنانة حلا شيحة للتمثيل مرة أخرى.

تحيا مصر يرصد تعليق ماجدة خير الله على عودة حلا شيحة. 

ماجدة خير الله مع برنامج قعدة ستات

وقالت ماجدة خير الله خلال مداخلة هاتفية لبرنامج “قعدة ستات” الذي تقدمه مروة صبري على شاشة “القاهرة اليوم"، : رأيي أن غياب حلا شيحة أو وجودها لا يترك أثر، وإحنا بندي قيمة كبيرة جدا بالحديث عن وجودها أو اختفائها، هي فنانة محدودة الموهبة وفي عشرات من الممثلين والفنانين الموهوبين بجد محتاجين إلى فرص، وافتقادها مش حاجة مهمه.. وهناك فنانات سواء خريجي معهد أو لأ ولكن موهوبين جدا، وأخذوا فرص واثبتوا وجودهم.

تعليق ماجدة خير الله على عودة حلا شيحة

وتابعت: احنا بنضيع وقت مع حد مش مهتم بالفن، مش مهتم بالمهنة، بل بالعكس بيسئ إليها .. بيخلي الناس تعتقد أن المهنة دي شغلانه كده يقدر يخش فيها ويطلع زي ما هو عايز.

وأضافت: وجود حلا شيحة مع عادل إمام وشريف منير تفتكري هي اللي كانت موقفه الفيلم على رجله ؟! لاء طبعا حتى في اللمبي .. كانت عبلة كامل، هي حظها أنها كانت بتتواجد معها ناس هما اللي شايفين الحكاية، هي كانت مجرد بنت لطيفه شكلها حلو، خلاص الكلام ده من 15 سنة، لكن دلوقتي لم تعود البنت اللطيفة، في 15 مليون واحدة طلعوا بعد كده موهوبين وحلوين وسنهم مناسب.. احنا ليه ماسكين في أهداف واحدة مش مهتمة بالشغلانه الفنية خالص.

ماجدة خير الله تنتقد حلا شيحة

واستطردت: إن حلا شيحة تروح وتيجي يبين أنها مش مهتمة بالفن أصلا أو في وقت فراغها أو متضايقة أو وزهقانه تقولك أما أعملي فيلم، إحنا ليه نستجيب لده؟.

وأردفت: وعن حديث نقيب الممثلين بأنه سيأخذ رأي الأسرة الفنية حتى تعود حلا شيحة، والله يرحبوا بيها إذا متقبلينها، لكن هل الجمهور هقدر أفرض عليه حب فنانة هي مش مهتمه أو بتهين المهنة .. والله لو ده اللي ماشي يتحملوا بقى ؟!  الناس مش هتبقى مرحبة  الناس هنا اللي هو الجمهور والشركات المنتجة لازم تكون حريصة على العمل الفني .. ممكن تعمل ربكة لشركات الإنتاج وربكه لزملائها، لو الناس هتتحمل هذا العبث اوكي .. اكننا بنقدم فن مفيهوش مسئولية.

واختتمت ماجدة خير الله حديثها قائلة: مفيش شخص على وجه الكرة الأرضية معندوش مشاكل نفسية لكن مترميش مشاكلك النفسيه وعقدك على الآخرين، حلا شيحه بتاخد فرصة بتاعه آخرين .. فإذا لم تكن جاده وتموت نفسها علشان تثبت هذه المره أنها تستحق هذه الفرصة .. فعليها أنها تبعد للابد.

يعد برنامج “قعدة ستات” من تقديم الإعلامية مروة صبري على شاشة “القاهرة اليوم” يوم السبت من كل أسبوع، وتستضيف خلاله نجوم الفن والمجتمع .