أنا أغلى مغني في مصر وعمر الشريف أنقذني وأحمد زكي قفل الباب قدامنا.. أسرار لأول مرة يكشف عنها محمد رمضان

كشف الفنان المصري محمد رمضان عدة مفاجآت خلال حلوله ضيفًا على الإعلامي معتز الدمرداش، ببرنامجه ضيفي، المذاع على شاشة الشرق.

تحيا مصر يرصد تصريحات محمد رمضان.

محمد رمضان يكشف عن أجره

قال محمد رمضان: حفلاتي هي استعراض ترفيهي، مش مجرد إني أمسك الميكروفون والجمهور واقف وأقول السقفة معانا، وده اللي بيميز حفلاتي ومخليني أغلى مغني في الوطن العربي، المغني المصري اللي أجره تحت أجري بياخد 50% من أجري، زائد إني لازملي طيارة خاصة، وعدد معين من الراقصين، فأكيد في شيء أقدمه يستحق ده، وفعلا حفلاتي تتطلب مجهود كبير.

وتابع: قبل مسلسلي ابن حلال كان في ممثل تركي بيحطوا صورته في كل حته في مصر، وده خلق عندي غيرة وعِند، وقلت يعني إيه مسلسل تركي يتشاف أكثر من مسلسل مصري، وقلت والله ما هيحصل تاني ممثل تركي يطبعوا صورته على تيشرتات وإحنا ممثلين مصريين موجودين، وبالفعل من وقتها محصلش ده.

علاقة محمد رمضان بلورانس العرب 

وعن عمر الشريف، أضاف: إشادته بيا كانت جاية بعد مانا مبشتغلش بقالي سنة، وبعدها قعدت سنة مبشتغلش، وهو كان شايف فيا حاجة ومؤمن بيا.

وكشف سبب ركوبه طائرات خاصة قائلًا: في الطبيعي الناس بتروح قبل الطيارة بساعتين ولكن دي الميزة في الطيارة الخاصة بتختصر الوقت بتركب تمشي على طول زي التاكسي، بستفيد من كده أوصل بدري أعمل بروفات أجهز حاجة.

واستطرد: أنا بقول كلمات أغاني بتكون لايقة على لبسي، يعني بقول مثلا في أغنية  فلوس زي المطر نازلة عليا، هل ينفع أقعد على غية حمام وأقول كدا؟!.

وأردف: مكتبي تحت الكنبة المفضلة لأمي، وأنا طبقت الجنة تحت أقدام الأمهات بعشم مع والدتي حرفيًا، وبطلع أقعد معاها شوية أنام على رجليها.

واستكمل: مراتي نسرين متفهمة طبيعة شغلي وإن أوقاتي الأسرية ضيقة جدًا، وأنا عمري ماسافرت برا مصر سياحة، دايمًا بسافر شغل وممكن أسرق نزهة صغيرة في النص.

محمد رمضان يعبر عن رغبته في تجسيد السيرة الذاتية لأنور السادات
 
واختتم محمد رمضان حديثه قائلًا: لو كان بإيدي لكنت أعمل السيرة الذاتية لـ السادات، ولكن الفنان أحمد زكي عمله وقفل الباب قدامنا، وإن اسمي يتحط في جملة مفيدة معاه ده شرف عظيم جدًا.