عملت لأبويا أعمال لحد ما مات.. هاجر: أمي رمتني وسرقت ملايين الميراث | فيديو

واقعة مأساوية تعرضت لها فتاة تدعى هاجر في القاهرة على يد والدتها، وذلك بعد وفاة والدها، حيث إتهمت هاجر والدتها بسرقة ميراثها والتزوير في أوراق رسمية للإستيلاء على أموال والدها وممتلكاته وعدم إعطائها الميراث.

بيلبس هدوم حريمي.. أماني تطلب الخلع: زوجي غير سوي وسلوكه غير طبيعي

صور ومقاطع إباحية مزيفة.. قرار عاجل بشأن المتهم بابتزاز الفنانة راندا عبدالسلام

مأساة هاجر مع والدتها

وسردت هاجر مأساتها مع والدتها لـ تحيا مصر قائلة «أنا إسمي هاجر وبنت تاجر كبير جدا، لكن ماما عملت لـ بابا سحر وشعوذة وأذيته كتير بأعمالها دي، وأذتني أنا كمان خلتني أطلق وأعمل مشاكل مع جوزي، كانت بتعمل لبابا سحر وأعمال تدفنها على رأس خروف».

وتابعت هاجر «في النهاية بابا جاله نزيف داخلي وشلل نصفي وإضطراب عام في الوعي، ومات من الحسرة من أفعالها، وبعد ما مات طلعت هي توكيل قالت أن بابا عامله ليها وباعت بيه عمارة في المقطم بـ 30 مليون جنيه، ورمتني أنا في الشارع في شقة إيجار».

هاجر: أمي عملت أعمال على الصابون

وأضافت هاجر قائلة «ماما كانت بتعمل كتير معايا ومع بابا، كانت تعمله سحر على صابونة وتعمله أعمال في الأكل، كان الحقد مالي قلبها عشان بابا أتجوز أتنين بعدها، وهي كانت فاكرة إني جوزته الست التالتة، وبعد ما مات بابا هي وأختي الكبيرة أخدوا كل حاجة، وباعوا عمارة في سوق السلاح بـ 10 مليون جنيه، وعمارة تانية في سوق السلاح باعتها لأختي بالتوكيل، وكل ده كان بغرض الإنتقام منه».

وأكملت هاجر «بابا كان يدخل يصلي وهي تسرقه وتقول له هاجر اللي سرقتك وهو مكنش بيصدقها، وأنا مطلقة دلوقتي بسببها وقاعدة في شقة إيجار، وأي حد كان بيقولها إدى بنتك حقها كانت تقول لا جوزها مينفعش يعيش في خير جوزي، وأنا رفعت عليها محاضر تزوير في الممتلكات اللي إتباعت، وأنا مش لاقية حد يصرف عليا وعايشة لوحدي وأنا كدة هضيع لأن معنديش حد، وأنا قولتلها لو أنا وحشة وعملت غيه فيكم فين حقي الشرعي».

دفاع هاجر: والدتها إستولت على الميراث بتوكيل مزور

وقال المحامي طارق مصطفى محامي هاجر، «أنا عارف هاجر من الدرب الأحمر وفي الأول مكناش مصدقين اللي هي بتقوله، لكن لقينا كل حاجة صح، ولما روحنا المحكمة عرفنا إن التوكيل مزور بدليل البصمة بالشمال اللي موجود عليه والتوكيل باليمين، وكمان تقارير المستشفى بتقول إن والد هاجر كان عنده إضطراب عام في الوعي وناقص للأهلية ومريض بنزيف حاد في المخ، إزاي هيعمل توكيل لمراته قبل وفاته، وكانت المفاجأة إن الأم والأخت الكبيرة بيبيعوا كل حاجة بالوكالة اللي هي أصلا مش صحيحة».