محمد حماقي يكشف عن موعد طرح ألبوم صيف 2023

كشف الفنان المصري محمد حماقي، عن موعد طرح ألبوم صيف 2023، الذي يتعاون فيه مع الشاعر أيمن بهجت قمر، وذلك خلال مؤتمر صحفي أقيم على هامش إحيائه حفل جدة.

تحيا مصر يرصد موعد طرح ألبوم محمد حماقي لصيف 2023.

تصريحات محمد حماقي

قال حماقي: مفيش سينجل في صيف 2023.. هيكون فيه ألبوم كامل وهبتدي أنزل فيه بعد العيد.

وتابع: مشتغلناش الألبوم اللي فات بس السنة دي فيه مشاريع كتير في الألبوم إن شاء الله، موضحًا أن هناك مشروع ديو يتم التحضير له في الفترة الحالية، وسيتم الإفصاح عن تفاصيله بعد الاتفاق عليه.

طقوس محمد حماقي قبل انطلاق حفلاته

وأضاف: مفيش أكل كتير يوم الحفلة، أقصى حاجة بأكلها مكرونة مسلوقة مثلًا، ومرة محمد زكي أكلني خروف شاورما قبل الحفلة كنت هنام، بس في العادة مش باكل حاجة تقيلة، بالعكس عشان تديني طاقة أغني وأنا مرتاح، وديمًا قبل ما أطلع على المسرح بخمس دقائق بحب أكون لوحدي خالص ومش معايا حد عشان أجمع تركيزي وطاقتي.

واختتم حديثه قائلًا: شريف منير طلب مني حضور الحفلة عندما التقينا في مسرحية ميمو للفنان أحمد حلمي، وقولتله يشرفني بس لو جيت هتلعب أغنية، وجيه ووفى بوعده، والجمهور اتبسط وهو كمان، وديمًا بقول احنا كسبناه في التمثيل وخسرناه في المزيكا.

لقاء محمد حماقي الأخير مع والده

وكان تحدث محمد حماقي عن تفاصيل اللقاء الأخير مع والده، قائلًا: كان في يوم عندي حفلة و بطني مضايقاني وانا وبغني وخلصت غنا وخرج هو وامي من القاعة وبعدين وقف هزر معاه وطلع ملبس وقالي خد حلي بوقك ومشي، كان بالليل، وبعد ما مشي كلمني في التليفون واطمن عليا.

وتابع: و ٩ الصبح جالي تليفون انه اتوفى، ودي كانت مرحلة وحشة وكان عندي لحن قبل ما ابويا يتوفى من تامر علي وكاتب كلمتين اللي هما اول اتنين كوبليه.

وأضاف حماقي: وقعدت فترة طويلة مبنزلش من البيت وأمير طعيمة فضل يكلمني عشان يخرجني وجه في يوم تحت البيت ونزلت ركبت معاه العربية وقعد يقولي الكلام اللي الصحاب بيسندوا بعض فيه.

وأردف: وقولتله عندي اغنية عايزة تكتبها، وكتب اللقاء الاخير اللي بيني وبين ابويا في الاغنية وانا استغربت هو وصل كده ازاي.