محسن جابر: عمرو مصطفى لولايا مكنش شاف الهضبة.. والأخير: بتزور في التاريخ

لازالت الأزمة بين المنتج محسن جابر والفنان عمرو مصطفى قائمة، حيث خرج محسن جابر وكشف قصة لقاء “مصطفى” بالهضبة عمرو دياب، مشيرًا إلى أنه لولاه لم يكن عمرو مصطفى قابل الهضبة.

تحيا مصر يرصد في ذلك التقرير اشتعال الأزمة بين عمرو مصطفى ومحسن جابر

أزمة عمرو مصطفى ومحسن جابر

وقال محسن جابر في تصريحات تليفيزيونية: السكرتيرة قالت لي في واحد بيعيط ومنهار عايز يقابلك ده عمرو مصطفى، واتضح إنه الليلة اللي قبلها عرف إن عمرو دياب بيسجل في ستوديو راح يسمعه أغنية وفتح عليه أوضة التسجيل وهو بيغني فقال مين ده طلعوه بره.. لا سمع ولا شاف ولا عرف والبودجاردات طلعوه فجالي بيعيط وبيقول أنا رموني بره.

وتابع: وأنا كنت رايح لعمرو دياب فقلت له تعالى معايا وخدته معايا وسمعته لعمرو دياب فعمرو قال الله الأغنية حلوة قوي فقلت له أومال عملت كده في الراجل امبارح ليه قاله هو أنت!! ولولا إني خدته معايا مكانش عمره شاف عمرو دياب.

عمرو مصطفى: انت بتزور في التاريخ وانت في السن ده

ورد عمرو مصطفى على هذا التصريح، فقال: يعني أنت بتزور التاريخ وأنت في السن ده.. طب أرد عليك إزاي وأنت راجل في السن ده، أقسم بالله كل كلمة نطق بها هذا الشخص كاذبة.. ولي حق الرد في نفس البرنامج أو برنامج آخر لفتح جميع ملفاته وملفات شركاته وجميع الفنانين الذي يطلقهم على القنوات علشان يهاجموني أنت مَن دمرت الفن في الوطن العربي، استلمت مصر أم كلثوم وفايزة وشادية وعظماء لحد ما وصلتها للمهرجانات.. ده الوقت اللي لازم حد يقف لك وينهي المهزلة دي.

تصريحات محسن جابر عن عمرو مصطفى

وكان قد قال محسن جابر: قابلت كتير تطلّع حد وفي الآخر يعورك وأنا اللي طلعت عمرو مصطفى والكل شاهد وكانوا يقولوا لي أدينا نص اهتمامك بيه، وانتهت العلاقة بينا لما حس أن هو كتير على الناس الآخرين.

وتابع: دوشة عمرو مصطفى للدعاية والتسويق لنفسه، وأنا كنت بعمل حاجات صادمة ولكن إيجابية، وأنا مش زعلان منه وهو ولد من أولادي وغلطه فيا ربنا يسامحه، وأتمنى له الهداية وعايزة يكون أحسن ناس ويارب يكون نمرة واحد في اللي موجودين.