محمد رمضان عن أشقائه: عايش مع اتنين فلاسفة

فجر الفنان المصري محمد رمضان عدد من التصريحات التليفزيونية حول أسرته وحبه للقراءة.

تحيا مصر يرصد تصريحات محمد رمضان.

تصريحات محمد رمضان 

وقال محمد رمضان: الرحلة أنا مبسوط بيها جدًا بدأت من ضواحي الجيزة والمنطقة اللي أنا اتولدت فيها شكلت جزء كبير في شخصيتي وخيالي، وبيتي أبويا وأمي وإخواتي شكلوا شخصيتي ورؤيتي للمستقبل.

محمد رمضان يتحدث عن عائلته

وتابع: أخويا وأختي خريجين آداب فلسفة، فعايش مع اتنين فلاسفة، والفلسفة هي البحث عن الحقيقة، فالكتب متناثرة حولي، وكنت بحب القراءة جدًا، كنت بتخليني أغوص وأعيش فيها، أخويا كان بيجب كتاب الأيام لطه حسين، وإيمان أختي كانت عاشقة للقراءة.

وأضاف: وأبويا رجل مثقف كان يقرأ الجرائد بشكل يومي، فكل ده شكل جزء كبير في شخصيتي، وحي القصبجي اللي اتولدت فيه كان 8 بيوت في المربع السكني وحوالينا زراعة، كانت منطقة ريفية بنسبة 70% وشعبية 30%.

واستطرد محمد رمضان: كنت بشوف الأهرامات من البيت، قدامي هرم وعظمة وشيء غريب، ومرة قررت وأنا في تانية إعدادي ألمس الهرم أنا شايفه صغير وفي مخيلة طفل أن لو مشيت في نفس الطريق اللي قدامي هوصل للهرم.

قصة محمد رمضان مع الأهرامات 

وأردف: صحيت تاني يوم كأني رايح المدرسة ومعرفتش أوصل للهرم، والمشوار ده عمري ما هنساه والكلاب تجري ورايا وأقع في الطينة، وأمي راحت تسأل عليا في المدرسة مش لاقياني والمغرب أذن، رجعت البيت اتضربت علقة جامدة جدًا من أمي.

واختتم محمد رمضان حديثه قائلًا: وفضل المشوار ده في ذهني وبقى عقدة، أن الطموح دايمًا مربوط بالمشوار ده أنك ممكن تبقى شايف النجاح ومتعرفش تلمسه.

جدير بالذكر أن الفنان محمد رمضان كان قد تعرض لهجوم واسع بسبب استعراضه للدولارات.