بعد اعتذاره عن العمل شيرين عبد الوهاب.. إيهاب صالح يتولي إدارة أعمال كارمن سليمان

أعلن إيهاب صالح، مدير أعمال الفنانة شيرين عبد الوهاب السابق عن توليه منصب إدارة أعمال الفنانة كارمن سليمان، وذلك بعد ساعات قليلة من اعتذاره عن العمل مع شيرين عبد الوهاب.

يرصد تحيا مصر في ذلك التقرير تفاصيل تولي إيهاب صالح إدارة أعمال كارمن سليمان بعد شيرين عبد الوهاب

إيهاب صالح مدير أعمال كارمن سليمان

وكتب إيهاب صالح عبر حسابه الرسمي بموقع التدوينات القصيرة “تويتر”: “سعيد و بتشرف جدا انى أعلن إن من النهاردة مسكت رسميا إدارة اعمال النجمة كارمن سليمان. كارمن حد موهوب فوق الطبيعي، شخصية في منتهي الجمال و الرقي و من وجهة نظري هي المستقبل عشان عندها كل الامكانيات و هي عارفة إني فان كبير ليها من قبل مشتغل معاها فعلا. كارمن إن شاء الله الميجاستار القادمة من مصر للكل الفترة الجاية و افتكروا كلامي ده كويس.”.

إيهاب صالح: بحب التحدي ودايما بكون قده وجهزوا نفسكم عشان فيه أخبار جامدة قريب

طول حياتي بحب التحدي و الحمد لله بكرم و توفيق من ربنا كبير دايما بكون قد التحدي. شكرا على كل الدعم من كل الناس و كل الامنيات الجميلة الفترة إللي فاتت و أللى جاي إن شاء الله. املى فيكم كبير بعد ربنا سبحانه وتعالى، ولجمهور كارمن بقي، الكل يجهز نفسه كويس عشان إن شاء الله في اخبار كتير حلوة و جامدة قريبا و يا رب ابقي عند حسن ظنكم .

اعتذار إيهاب صالح عن العمل مع شيرين عبد الوهاب

وكان قد اعتذر إيهاب صالح عن العمل مع شيرين عبد الوهاب وذلك بعد حفلها الغنائي في جدة الذي أقيم أمس الأحد، حيث جاء منشوره: جمهور شيرين العظيم ، الحمد لله علي نجاح حفل جدة كما كان متوقع و ده العادي بتاع شيري في أي حفلة.  أجلت الاعلان بالقرار ده لحد بعد الحفلة و حابب أشكركم جدا على كم الدعم الرهيب في خلال الفترة أللى فاتت ليها في المقام الاول و طبعا بعد كدة ليا. قررنا إن من الافضل لينا إن نحط صداقتنا و العشرة قبل أي حاجة و إني ابتعد عن إدارة أعمالها و ده أكيد لمصلحة الطرفين و لينا اسبابنا.

وتابع: مبروك و شكرا يا شيري من كل قلبي و يا رب اكون كنت على قد وعدي و كلمتي ليكي انى دايما في ضهرك و الحمد لله الدنيا دارت من أول و جديد و تكسري الدنيا حفلة بعد حفلة و خلاص أهو الالبوم على أبواب و متأكد إنه هينجح نجاح غير عادي. فرحان بشكل ملوش وصف بنجاحك و رجوعك بالقوي دي و ده إللي اتعودنا علية منك طول السنين دي. أنا كدة كدة دايما موجود زي مانتي عارفة و ربنا يديم كل أللى بينا على خير و أسف لو في أي لحظة كنت قصرت معاكي باي شكل .