معشتش طفولتي وردود الفعل على صورة المايوه كانت صعبة.. أبرز تصريحات عارفة عبد الرسول

فجرت الفنانة الكبيرة عارفة عبد الرسول عدة تصريحات خلال حلولها ضيفة على برنامج واحد من الناس الذي يقدمه الإعلامي عمرو الليثي.

تحيا مصر يرصد تصريحات عارفة عبد الرسول.

عارفة عبد الرسول في برنامج واحد من الناس 

وقالت عارفة عبد الرسول: أنا من مواليد حي الإبراهيمية بالإسكندرية لكني اتربيت فى حى الحضرة، وبابا سمانى عارفة على اسم جدتى وكنت مش بحب الاسم، وكانوا بيندهولى فى العائلة بميرفت، واكتشفت بعد كده إن الاسم حلو.

تصريحات عارفة عبد الرسول التليفزيونية 

وتابعت: أعمامى 7 وأبويا أصغر واحد فيهم وفتح محل بقال، وكان بيوقفنى فى المحل مكانه لإنه كان شاب وذواق بيروح للسينما ويسيبنى فى المحل وأنا فى سن 3 سنوات، ولم أعيش طفولتى، وأول مرة أركب ملاهى فى حياتى كان فى مسلسل اللعبة.

واستكملت: والدي كان بيديني فى الاسبوع 25 قرش، وكنت بحوشهم واشتريت بيهم حاجات ليا، وبابا تعب من البقالة فقولت ليه نغير يا بابا نعمل محل كوافير فقال لى مش شغلانتنا، فقولت ليه اتعلمها وفعلًا روحت اشتغلت فى كوافير سنة بدون مقابل، واشتغلت مع الفنان وحيد سيف كان بيعمل مسرحية فى الإسكندرية.

واستطردت: كان فى فنانة اسمها ولاء عندها تصوير فيلم، وقالوا لى اعملى الدور مكانها، ورجعت تانى بعد تاجيل الفيلم فالاستاذ وحيد سيف قالى خلاص بضحكتك الحلوه دى تقعدى على شباك التذاكر وفعلا قعدت ابيع تذاكر.

وقالت عارفة عبد الرسول، خلال لقائها ببرنامج واحد من الناس: فكرة إنى أعمل عملين فى وقت واحد صعبة جدًا بالنسبة لى  فى مسلسلين الأجهر وبابا المجال فى وقت واحد، وكنت أخلص الفجر من بابا المجال وأطلع على المطار أسافر أعمل مسلسل الاجهر وأرجع آخر النهار على بابا المجال. 

وأشارت إلى أن دورها فى فيلم عيار نارى  من الأدوار المهمة، للمخرج كريم الشناوى وقدمنى كبطلة.. لم اخف من تجربة الإعلان وجت بالصدفة برضوا واتفقت معهم وأرسلوا لي الأغاني، وأنا مش فى دماغى، وفوجئت بيقولى لي تعالي علشان تسجلى الأغانى بصوتك، فروحت وعجبهم، وجابولى مدربة رقص علمتنى رقصة الإعلان راب، وانا مش بحب العكننة، ولازم أضحك زوجى، وكان كل ما ينكد عليا أقول الصبر من عندك يا رب وأسكت لحد ما يهدى خالص.

وتابعت الفنانة عارفة عبد الرسول: دخلت فنون جميلة بالصدفة، بسبب زميلة لي كانت بتعمل كل وسائل الايضاح الخاصة بالمدرسة، وقالت لى تعالى معايا فرحت معاها وأنا نجحت وهى سقطت فى اختبار القدرات، ولما روحنا سألنا قالوا لي إنتى عملتي حياة للوحة اللي رسمتيها، والعيلة كلها أطباء وأوائل الثانوية العامة.

تعليق عارفة عبد الرسول على انتقاد صورتها بالمايوه 

وعن صورتها بالمايوه قالت: أنا اللى طلعت صورة المايوه ولم أتوقع رد الفعل بعدها، وكنت فرحانة بالصورة، لكن ردود الفعل كانت صعبة أوي.

وأضافت عارفة عبد الرسول: أنا لا أعرف تاريخ ميلادى شهر كام بالظبط لأن كان عندى بنت خالي مديرة مدرسة ولعبت فى شهادات ميلاد العيلة كلها علشان دخول المدارس وأنا مواليد سنة 53، لكن لا أعرف برجى إيه.

وتابعت: أنا إنسانة مسرفة جدًا فى حياتى، وجوزى هو اللى ماسك مصروف البيت وأنا باخد منه مصروف.

وأردفت عارفة عبد الرسول: أتمنى تقديم مسلسل اللعبة بطريقة تانية، واتكلمت مع شيكو وهشام ماجد، وأنا عاوزة أعمل مطاردة بالعجل وأركب عجلة.

واختتمت عارفة عبدالرسول حديثها قائلة: أتمنى التمثيل أمام أحمد حلمي وأحمد مكي، ولم أحزن على تأخر النجومية وربنا له أحكامه في ذلك، والشاعر الكبير سيد حجاب قال عليا إنى اختراع، وعامل السن لم يوقفني عن تحقيق ذاتي.