مي فاروق: شركات الإنتاج دايما يقولولي أنتي بتغني لفايزة ووردة ومش هتكسبينا

كشفت الفنانة مي فاروق عن السبب وراء عدم تعاونها مع شركة إنتاج لطرح أغانٍ خاصة بها، وذلك خلال لقائها اليوم ببرنامج حروف الجر مع الإعلامي يوسف الحسيني.

تحيا مصر يرصد تفاصيل تصريحات مي فاروق في حروف الجر

وقالت مي فاروق: معنديش إنتاجات كتيرة خاصة بيا بعيدة عن الكلاسيكيات، وللأسف دايما بيتم حصري في إني كسلانة أو أني بحتاج أغاني بنفس الطرب القديم، ولكن محدش يعرف الحقيقة.

مي فاروق وشركات الإنتاج

وتابعت: شركات الإنتاج كانوا دايما يقولوا ليا أصل أنتي بتغني غنا تقيل وقديم وعمرك ما هتنفعي في السكة الحالية، أنتي بتغني لفايزة ووردة أصل أنت مش هتكسبيني فخليكي على جنب، فبدأت أحبط وأزعل وأتضايق، لغاية ما عملت شوية تجارب منفردة زي أغنية يا شمس يا منورة غيبي ومصر كلها غنتها وكسرت الدنيا.

واضافت: شركات الإنتاج بتدور عن الحاجات اللي مكسرة الدنيا وتجري وراها مش الحاجات المختلفة وتبروزها زيادة، ودا اللي أنا شايفاه، رغم أن فيه فئة كبيرة بردو بتدور عن الفن اللي بجد ومش التيك أواي، بدليل أن حفلاتي في أي مكان بتكون محجوزة بالكامل، وأنا مطربة وبحب الفن جدا، وفيه مسؤوليات عندي تانية خصوصا أن عندي بيت وأولاد، وبالنسبة لي الأمومة قبل الفن.

مي فاروق تعبر عن حزنها الشديد

وسبق وأن علقت المطربة المصرية مي فاروق، على وفاة والدها بعد فقدانها لوالدتها، معبرة عن حزنها الشديد.

وكتبت مي فاروق عبر صفحتها الرسمية بموقع التواصل الاجتماعي فيس بوك: فقدت ماما من 19 سنة وكان بعدها الإحساس بالخوف من الدنيا هو اللي مكمل معايا وكان إحساس إن بابا معايا وموجود مطمئن لي لكن بعد فقد الأب بيكون ما تبقى من شعور بالأمان اختفى تماما.

مي فاروق ووالدها

وأضافت: فلا أمان ولا ثقه في الدنيا ولا البشر بعد فقد الأب فالأم كسرة للقلب والأب كسرة للظهر ربنا يرحمهم وأقدر دائما أكون البنت اللي تشرفهم ويجعلني سيرة طيبة ممتدة لهما كما تمنوا.

وفي وقت سابق، طالبت المطربة مي فاروق الدعاء لوالدها، الذي صارع المرض في المستشفى قبل وفاته، موجه له بعض الكلمات المؤثرة، مشيرة إلى أنها تعتبره ابنها وسندها.