دلق مياه النار.. الحاجة زينب تستغيث من إبنها: ضربني وسحلني في الشارع|فيديو

صرخات أم في الشرقية.. جلست على سريرها تندب حظها وتتلفظ بكلمات «شكبت لربنا يامحمد، منك لله ربنا موجود»، لتسرد وقائع مأساوية تعرضت لها على يد إبنها على مدار فترات طويلة، حتى وصل به الأمر إلى التعدي عليها بالضرب وإلقاء مياه النار على ملابسها، ومحاولة طردها هي وشقيقته من المنزل.

سب وقذف عمرو أديب.. حكم عاجل من الإقتصادية ضد محمد رمضان

مرض جنسي معدي ومنع دخول الكمبوند.. أسرار مفاجأة في خناقة حسن شاكوش وزوجته|فيديو

مأساة أم مع إبنها في الشرقية

سردت الحاجة زينب من مدينة الزقازيق بمحافظة الشرقية مأساتها مع إبنها لـ «تحيا مصر»، قائلة: هقول إيه ده كل شوية سب وضرب فيا، وشتائم في بناتي، وده مش جديد، محمد من زمان وهو بيضربني ويشتمني، وأي حاجة جميه بيدلقها في وشي أنا شوفت منه كتير، وأتحملت منه كتير وأقول معلش بكرة أموره تتعدل».

وتابعت الحاجة زينب مأساتها مع إبنها بمحافظة الشرقية: أنا عندي 5 بنات و3 شباب، والدهم توفى من حوالي 20 سنة، وربنا العالم شحت الملح عشان ياكلوا ويشربوا، وخرجت للسوق اشتغل عشان أجوز البنات، وجهزت 4 بنات وجوزتهم، وفضلت البنت الأخيرة اللي كان عندها سنة لما أبوها مات، وخلاص كنت تعبت مش قادرة.

استغاثة أم: ضربني وسحلني في الشارع

وأضافت الحاجة زينب، محمد مريض مفيش بني أدم كدة، بنتي الصغيرة إتخطبت وبعد سنة ونص، أخوتها قالوا إحنا نفسخ خطوبتها، ومحمد قال عايز حقها في البيت، عشان أجهزها، وأنا قولتله أمضي أنا على حقي وسيب أخواتك أنا حقي تمن في البيت، ومضيت فعلا بعد ما جاب واحد وخلاني أمضي بـ 60 ألف جنيه، وفعلا مضيت، وشهدت الراجل على محمد وأخواته أنه هيجهز أخته الصغيرة.

وأكملت الحاجة زينب في قصتها مع إبنها في الشرقية: محمد طمعان في البيت، وقالي بناتك ميجوش البيت ده قولتله هتحرمني من عيالي وأنا عايشة، ولما بنتي إنفصلت عن جوزها ورجعت تعيش معايا وهو مكنش موافق، وبعدها حط كلب على السلم عشان منعرفش نطلع ننشر الغسيل، وقفل باب البيت عشان منعرفش ندخل ونخرج، وفي شهر رمضان ضربني في البيت، وبعدها في العيد الكبير يوم الوقفة ضربني في الشارع قدام الناس وسحلني، ودلق عليا مياه.

أم: مش مهم أنا المهم بناتي

وأختتمت الحاجة زينب، أنا عايزة حقي، عايزة رجال الأمن والدين يدخلوا حد ينقذني من إبني، قبل ما يطردني في الشارع، أنا مش مهم أمشي المهم أخواته البنات، وأخته اللي لسه متجوزتش واللي منفصلة، محمد دلق على هدومنا مياه نار وكل ده وأنا ساكتة بس ياخد باله من أخواته البنات.