منة فضالي: مش بآمن بالأعمال والشعوذة.. وواخذة موقف من الجواز

أكدت الفنانة منة فضالي على أنها لا تؤمن بالأعمال والشعوذة، وذلك خلال لقائها اليوم ببرنامج مساء دي إم سي مع الإعلامي رامي رضوان.

تحيا مصر يرصد تفاصيل تصريحات منة فضالي في مساء دي إم سي

وقالت منة فضالي: أنا ماليش في السحر والشعوذة ومش بآمن بيها أبدا، وزمان حد قالي أنه معمولي عمل بس كانت حاجة تافهة، وأنا مش بصدق في الكلام دا.

منة فضالي في جعفر العمدة

وفي الحلقة ذاتها كشفت منة فضالي عن تفاصيل تعاونها مع الفنانة هالة صدقي خلال مسلسل جعفر العمدة، وقالت: هالة صدقي أنا بعشقها عشق، وبعتبرها صاحبتي الانتيم، طيبة جدا.

وتابعت: وبتحب الناس كلها من قلبها، وراجل جدا، وهي ذنانة أوي في موضوع أنها عايزاني اتجوز، وأنا واخدة موقف من الجواز عشان اتعودت أبقى لوحدي ومبسوطة كدا، ومحبش حد يجي يتحكم فيا.

وعن تجربتها مع المخرج محمد سامي قالت: محمد سامي عنده أمانة مع الممثل وبيطلعه حلو جدا، وكل الناس عنده واحد، وأنا كنت متخوفة أنه يبقى دمي تقيل، وأنا عمري ما بتفرج على مشهد ليا بعد ما أخلص، ودايما بنتقد نفسي وبشوف أني مبعرفش أمثل.

تفاصيل مسلسل جعفر العمدة

ويعد مسلسل جعفر العمدة  من بطولة محمد رمضان وزينة، هالة صدقى، إيمان العاصى، مى كساب، منة فضالى، أحمد داش، منذر رياحنة، عصام السقا، فريدة سيف النصر، مجدى بدر، أحمد فهيم، فتوح أحمد سلوى عثمان، فريدة سيف النصر، جورى بكر، طارق النهرى، أحمد عبد الله، احسان الترك وضيف الشرف بيومى فؤاد، ومن تأليف وإخراج محمد سامى، وشارك فى السيناريو والحوار مهاب طارق وإنتاج شركة ميديا هب سعدى – جوهر.

وقالت منة فضالي خلال لقائها مع ميديا هب “سعدي- جوهر”، متحدثة عن نرجس: “شخصية فكاهية، مش كوميدية أوي بس دمها خفيف، مش جاهلة بس مخها على قدها وتفكرها محدود وطيبة جدا ورومانسية وشقية جدا وتحس انها كوكتيل ومن الشخصيات الصعبة عشان فيها شغل كتير والدور صعب وكان محتاج مجهود وتركيز، وحاولت على قد مقدر اشتغل على نفسي ومحمد سامي مسبناش".