منى زكي بعد نجاح تحت الوصاية: الأم مش عنصر هامشي وزمايلي في العمل كتلة مواهب متحركة

حرصت الفنانة منى زكي على تقديم الشكر إلى طاقم مسلسل تحت الوصاية، والذي عرض ضمن السباق الرمضاني المنقضي وحقق نجاحًا كبيرًا.

تحيا مصر يرصد لكم رسالة منى زكي لطاقم عمل مسلسل تحت الوصاية

منى زكي: شكرًا للي أخد من وقته وكتب كلمة حلوة عن المسلسل

وكتبت منى زكي عبر حسابها بموقع تبادل الصور والفيديوهات انستجرام:مع انتهاء موسم رمضان حابه أوجه الشكر لجمهوري في مصر والوطن العربي كله على كل التشجيع والحب اللي وصلني منكم.. شكرا لكل شخص أخد من وقته وكتب كلمة حلوة عن مسلسل تحت الوصاية.

منى زكي: بأدين بالفضل للمخرج محمد شاكر على أي حاجة حلوة في المسلسل

وتابعت: وأحب كمان أوجه الشكر لناس كتير جدا بداية من المخرج العظيم محمد شاكر خضير اللي عارف اللي في قلبي تجاهه وقد إيه هو فنان موهوب وعنده رؤية وحساس جدا.. وعلى المستوى الشخصي إنسانيته تفوق أي شيء أنا شوفته قبل كده، أنا بأدين له بكل الفضل على أي حاجة حلوة في المسلسل.

واستكمل: بشكر المنتج الكبير محمد السعدي وشركة ميديا هب، وخالد وشيرين دياب على الفكرة والموضوع والإبداع اللي مش جديد عليهم وبيبهرونا في كل عمل جديد بمواضيع مهمة، ومدير التصوير المتميز بيشوي روزفلت اللي قدّم صورة عالمية.. وأحمد حافظ المونتير العالمي اللي اتشرفنا بوجوده معانا، و الإشراف الفني و الديكور للمهندس محمد عطية اللي موهبته طاغية في الوطن العربي كله، والشاطرة مصممة الأزياء ريم العدل و الموسيقي التصويرية للمبدعه ليال وطفه و بشكر مساعدين الإخراج على تعبهم ومثابرتهم.. و قسم الإنتاج و علي رأسهم المنتج الفني هاني عبد الله وكل رجالته.. ومهندس الصوت إسلام عبد السلام. .. والـ acting coach رامي الجندي، ومساعدتي الشخصية شيماء.. وطبعا فريق وكالة جينجر.

منى زكي: زمايلي في المسلسل كتلة مواهب متحركة

وأضافت: وقبل أي حاجة بوجه الشكر طبعا لزمايلي في المسلسل اللي كلهم معجونين موهبة ولولاهم مكنش تحت الوصاية ظهر بالشكل ده.. حقيقي هما كتلة من المواهب المتحركة وعاشقين للفن من أكبر حد فيهم لحد البنوتة الصغيرة اللي فاجئتنا كلنا.

كما وجهت منى زكي رسالة إلى أهالي عزبة البرج وقالت: وأخيرا مش ممكن أنسى أهالى عزبة البرج وأجدع صيادين في مصر.. واللي حسسوني أني بقيت واحدة منهم طول فترة استضافتهم لينا.

منى زكي: الأم مش عنصر هامشي دي الأساس اللي قايم عليه كل البيوت

واختتمت منى زكي: حقيقي فرحت بتعليقاتكم وتفاعلكم مع المسلسل، وأتمنى إنه يكون نقطة بداية لإعادة النظر في قوانين الوصاية وإعطاء الأمهات الحق في أولادهم.. الزمن بيتغير والأوضاع بتتغير والمرأة والأم والزوجة مش عنصر هامشي، دي الأساس اللي قايم عليه كل البيوت، وهي الأصل في حياة أولادها.. وكذلك الأب.. لذلك نتمنى من المشرّع إعادة النظر في مسألة الوصاية وفي بنود كتير في قانون الأحوال الشخصية عشان نحفظ حقوق الأولاد والآباء والأمهات.