طارق النهري عن جعفر العمدة: مشوفتش نجاح زي دا من 45 سنة.. ومحمد سامي رفضني في البداية

تحدث الفنان طارق النهري عن تفاصيل مشاركته في مسلسل جعفر العمدة، الذي عرض خلال شهر رمضان الماضي 2023.

تحيا مصر يرصد تفاصيل تصريحات طارق النهري مع عمرو الليثي

وقال النهري خلال لقائه اليوم ببرنامج واحد من الناس مع الإعلامي عمرو الليثي: أنا بقالي 45 سنة في هذا المجال ومشوفتش النجاح دا، النجاح دا أنا حسيت بيه مرتين في حياتي أيام ممدوح الليثي في فيلم الطريق إلى إيلات، جعفر العمدة النهاردة.. والنجاح دا شيء جميل أوي أوي، وطبطبة من عند ربنا.

طارق النهري في جعفر العمدة

وتابع طارق النهري: في شخصية حمادة الأستاذ محمد سامي قعد معايا قبل ما نبدأ تصوير خالص، وكأنه ادالي حقنة شرحلي فيها أبسط تفاصيل هذه الشخصية، فلما بدأت أديها بقيت حاسسها أوي، الشخصية مش بتتكلم كتير أنما ليها ريأكشنات كتيرة أوي بتعبر عن الحالة وطبيعة الشخصية.

وأضاف: واختياري كان جاي من قبل الشركة ومن قبل محمد سامي، وأنا ماشتغلتش مع محمد سامي قبل كدا خالص، ومكنش يعرفني وقالهالي، قالي كنت رافضك أنما في أول قاعدة حبيتك بطريقة غير طبيعية، وبقينا فعلا صحاب جدًا من أول قاعدة ولغاية النهاردة.

واستكمل: ولما قريت الورق اتخضيت وخوفت، ولما قعد مع محمد وشرحلي بدأت أهدى وبدأت أدخل في الشخصية وأقرأها بشكل تاني خالص والحمد لله أنها طلعت بالشكل دا، وأنا ذاكرت واجتهدت عليها أوي وابتديت أحس بكل جملة بتتقال عشان أشوف أنا يأكشني هيبقى ايه، وكنت عايز أنا ومحمد سامي نحير الجمهور الشخصية دي ايه.

نهاية مسلسل جعفر العمدة

وسبق وأن كشف الفنان طارق النهري عن تفاصيل خطيرة تخص نهاية مسلسل جعفر العمدة، الذي يعرض حاليًا على شاشات التلفزيون طوال شهر رمضان الكريم.

وقال النهري: مقدرش أقول مين من عيالي في المسلسل هيموت الفترة اللي جاية، ولو قولت دا يبقى أنا حرقت المسلسل، وأنا لا يمكن احرق المسلسل، لازم تفضل الناس على التشويق لأخر خمس دقايق في آخر حلقة.

وتابع: شخصيتي أب لا يتكلم أنما عارف مصير الأسرة دي ايه في الآخر، وصمتي في المسلسل بيدل على الغلب.