شريف مدكور: مش بخاف من ربنا لأني بحبه والسرطان أفضل شيء حصلي

كشف الإعلامي شريف مدكور، تفاصيل رحلته مع مرض السرطان، وكيف كان هذا المرض الخبيث نقطة تحول في مواقف الجمهور تجاهه، وانتقالهم من مرحلة التنمر عليه، إلى مرحلة الدعاء له، حتى أن أحدهم طلب منه أن يسامحه لأنه تنمر عليه.

يصف "مدكور" إصابته بالسرطان، خلال لقاءه مع الكاتب الصحفي أحمد الخطيب، ببرنامج "كلم ربنا"، المذاع على راديو 9090، بأنه أفضل شيء حدث له في حياته، قائلًا: "أنا إصابتي بمرض السرطان كان من أفضل الحاجات اللي حصلت في حياتي! رغم قسوة الخبر عليا وعلى أسرتي".

تفاصيل إصابته بالسرطان

وحكى تفاصيل إصابته بالسرطان، حيث كشف: "كنت في العمرة وحوالين الكعبة دعيت ربنا دعاء غريب جدا .. لقيت نفسي بقوله يارب اديني علامة أو اشارة انك بتحبني .. كنت منتظر اشارة حلوة .. لكن فوجئت بعدها مباشرة اني مصاب بالسرطان!".

وتابع شريف مدكور: "يومها خرجت علي المشاهدين وأعلنت اصابتي بالسرطان لكن حصلت حاجة غريبة وهي إني لقيت مصر كلها انفجرت بالسؤال عني والدعاء ليا.. والملايين بتطلب من ربنا يشفيني ووجدت نفسي محاط بمشاعر حب من كل الناس!".

يؤكد مدكور أن اكتشف بعد تفكير عميق أنه إصابته بالسرطان كانت إشارة حب ربنا له وعلامة حب كبير "لما شفت الناس بيعبروا عن حبهم ليا تأكدت أكتر وأكتر لدرجة اني شفت ناس من القري والمحافظات كانت بتيجي تزورني والأطفال بترسمني!".

وكشف عن تحول معاملة ومواقف الجمهور منه: "حتي الناس اللي كانوا بيتنمروا عليا راجعوا نفسهم وموقفهم مني وبقوا يدعولي!".

دعوات التنمر

وأردف: "وأنا بتعالج من الكانسر.. كنت بكلم ربنا وأقوله أنا متأكد وعلى يقين بنسبة ١٠٠% أني هخف وربنا هينجيني من الشدة دي.. لأنه عمره ما خذلني ولا مرة.. حتى كنت بقول للدكاترة يلا خلصوني وشيلوا الورم دا من جوايا علشان عاوز ارجع أشتغل.. وكانوا بيضحكوا ويفكروني بهزر.. لكني كنت متأكد من كل اللى بقوله!".

واستطرد: "بحمد ربنا في كل وقت اني بقدر أتنفس وأقوم من السرير كل يوم .. وعلى رزقي ونجاحي..  كل حاجة بطلبها من ربنا بيستجيب لها!".

وتحدث عن غضبه من التنمر عليه في أوقات كثيرة، حتى أنه دعا الله أمام الكعبة أن يرحمه من هذا الفعل: "في مرة تانية وانا في العمرة وداخل حجر سيدنا اسماعيل كلمت ربنا وطلبت منه يرحمني من التنمر اللى الناس بتتنمره عليا لأني بزعل .. وبمجرد ما أنتهيت من صلاتي حول الكعبة واتحركت فوجئت بشخص معرفوش بيقولى: يا شريف انا اغتبتك وقلت في حقك كلام مش كويس .. من فضلك سامحني!".

وتابع: "للأسف أنا مش هسامح أي حد غلط فيا او اغتابني او شتمني.. ومنتظر يوم القيامة علشان نقف قدام ربنا ويحكم بيننا ومش هسامحهم!".

أحب الله ولا أخاف منه

وتحدث بمشاعر فياضة عن حبه لربه، قائلا: "ربنا بالنسبة لى هو كل حاجة.. ومبخافش منه لأني بحبه لدرجة لا يتصورها أحد.. ربنا عندي هو الحبيب المحبوب".

واختتم: "حابب أقول لكل الناس متخافوش من ربنا.. ربنا مبيعذبناش.. ربنا بيدينا فرص كتير علشان أحوالنا تتصلح ونتعلم منها.. لكن للأسف احنا اللى بنعذب ربنا لما بنأذي عباده".