زوجة بمحكمة الأسرة: جوزى عايزنى أشتغل خدامة عند صاحبه فى البيت

جوزى شخصيته ضعيفة ولما صاحبه طلب منه أروح أنضفله الشقة وافق وقاله حاضر ... بتلك الكلمات روت زوجة لتحيا مصر من داخل محكمة الأسرة عن زوجها الذى يطالبها بأن تذهب لصديقه المنزل مقابل مبلغ مادى منه على الرغم من أنه يعلم أن صديقه هذا سئ السمعه ويحمل نوايا دنيئة تجاه زوجته ولكن ضعف شخصيته وحبه للمال جعله يوافق ويبيع زوجته حتى قررت الأنفصال منه ورفع عليه دعوى خلع بمحكمة الأسرة .

رعب في قلب القاهرة.. طفل مكفن يسيل منه دماء على ظهر ميكروباص

الوداع الأخير في سهرة حمراء.. 4 جثث في شقتي المرج والمعصرة وكلمة السر عشيق وعلاقة غير شرعية

جوزى عاطل وعايز يشغلنى خدامة لصاحبه 

بدأت الزوجة حديثها لتحيا مصر :" أنا وجوزى متجوزين من 14 سنة وعندنا ولدين وبنتين جوزى كان شغال جزمجى وساب الشغلانة وبقى بيشغلنى أنا فى البيوت أكنس وأمسح للناس وأطبخلهم وياخد منى الفلوس لما أرجع البيت يشترى بيها سجاير وكروت فكة أنا عيشت معاه 13 سنة بحالهم أنا الراجل والست والأب و الأم لولادى اللى مستحملة كل ده عشانهم حتى أهلى متبريين منى بسببه وبسبب أنهم مش بيحبوا جوزى وكتير حذرونى منه وقالولى انه ضعيف ومش بتاع مسئولية وكانت غلطة وندم عمرى أنى مصدقتهمش ".

صاحب جوزى طلب منه أشتغل خدامه فى بيته  

وتابعت الزوجة حديثها :" جوزى عنده واحد صاحبه فاتح قهوة وبيشوفنى فى النازلة والطالعة وعينه منى من زمان ولما عرف من جوزى أنى شغالة فى البيوت قاله " أبعتهالى تنضف وتطبخ عشان مراتى غضبانة عند أمه وهديلك قرشين حلوين " وبالفعل جوزى وافق بسبب أنه عديم الشخصية من زمان ومبيعرفش يقول لحد لا خصوصاً لو هيطلعله منه مصلحة و قالى هتروحيله من بكرا ولما رفضت ضربنى وقالى " هتعملى كدة غصب عنك ومش بمزاجك " وفضلت ليلة كاملة ببكى بسبب قهرتى على حالى ".

زوجة: صاحب جوزى حاول يعتدى عليا 

وأختتمت الزوجة حديثها :" تانى يوم روحت لصاحب جوزى البيت ولقيته بيطلعلى قميص نوم وبيقولى " أنى فكرانى جايبك تنضفى انا جايبك عشان عجبانى من زمان " ولما حاولت أخد شنطتى وأخرج من باب الشقة منعنى وحاول يعتدى عليا وبمعجزة فلت من أيده ورجعت بسرعة البيت خدت عيالى وهدومى وروحت قعدت عند واحدة صاحبتى عشان عارفة أن جوزى لو شافنى هيجبرنى أرجع لصاحبه ده تانى عشان خاطر الفلوس أنا عايزة أخلع جوزى وأعيش بعيالى أربيهم وأصرف عليهم بالحلال بعيد عن الشيطان اللى كنت ضيعت عليه عمرى هدر".