صلاح عبدالله: عايزين تعرفوا الطيبة بصوا في وشي وبستقبل الصدمات الصحية بقلب قوي

تحدث الفنان صلاح عبدالله عن أسرار في حياته الشخصية، كما كشف عن كواليس بدايته الفنية، وذلك خلال لقائه في برنامج أنا والقناع.

تحيا مصر يرصد لكم تصريحات صلاح عبدالله

وقال صلاح عبدالله خلال البرنامج المذاع عبر قناة الحياة أنه أذا كان بإمكانه أن يلبس قناع معين، سيكون قناع الزعيم عادل إمام.

كما تذكر الفنان صلاح عبدالله والدته الراحلة، حيث أبلغ شقيقه فاروق عن طريق التليفون الأرضي للمسرح بأن والدتهم توفيت وذلك أثناء عرض مسرحية «الهمجي» مع الفنان محمد صبحي.

وقال صلاح عبدالله: أخويا الكبير اتصل بيا بالتليفون الأرضي وكنت بتكلم عند عم إبراهيم النجار ومكنش التليفون دخل بيتنا وفاروق قدر يوصل لإدارة المسرح وقالهم ميقولوش دلوقتي غير لما يخلص العرض.

وأضاف: كنت سايبها تعبانة وحاسس فيه حاجة وبقاوم عشان أمثل كويس لأنه كان يوم تصوير المسرحية وأهم يوم في حياة الممثل المسرحي يوم تصوير المسرحية.

وأستكمل صلاح عبدالله: صبحي ولينين دخلوا لي وهيأوني  وقالوا لي فيه عربية وروح وتعالى تاني عشان العرض التاني»، مشيرًا إلى أنه كان طوال الطريق في حالة صمت: صمت ومفيش دموع وصور أمي في جميع المراحل اللي عشتها معاها زي شريط سينما كده وكأني بتفرج على فيلم من ساعة ما وعيت على حضنها لحد ما سيبتها في السرير وهي تعبانة لحد ما وصلت البيت مش شايف حد قدامي جريت على الأوضة اللي كانت نايمة فيها أمي انفجار كل حتة وكنت ببوس السرير مكان إيديها ورأسها ورجلها.

صلاح عبدالله: بستقبل الصدمات الصحية بقلب قوي

كما كشف صلاح عبدالله أنه كان يستقبل صدمات الصحية بقلب قوي، وقال: شغلي في البدايات كان كله شقي عشان الواحد يحقق ذاته ويقدر يكون أسرة ويخليها تقدر تعيش في مستوي معين.

وأضاف: عندي رحلة شقاء قبل ما أحترف التمثيل من بولاق، بدأت رحلتي مع الفن، من بيت الغولة في بولاق.

وكشف: في الأحياء الشعبية، بيبقى فيه حاجة كدة عشان نخوف بيها الأطفال، فكانوا مسمينه بيت الغولة، وأنا استغليته يبقى حالة مسرحية، وأعمل فيه مسرح وأجيب الناس تتفرج في بولاق.

صلاح عبدالله: بما إن العمر بيخلص يبقى كل الحاجات هتخلص

وأردف: "كل ما أفتكر المواقف المؤلمة اللي عيشتها، ببدأ أقاوم، كل الأحزان، وأخلي الذاكرة تستدعي حاجات كويسة، ونفسي كل الناس اللي بيجيلها إكتئاب لو في حاجة مسببه حزن شديد ومعدش في أمل في الدنيا افتكر الحاجات الصعبة اللي مرت عليك قبل كده، وقتها كان عندك نفس الإحساس كل خلص واستمريت وعيشت، وبما إن العمر بيخلص يبقى كل الحاجات هتخلص.

صلاح عبدالله: عايزين تعرفوا الطيبة بصوا في وشي

وكشف صلاح عبدالله إن أساس دخوله عالم مواقع التواصل الاجتماعي، نابع من إحساسه بأهمية لعبه لدور كمواطن مصري، وأوضح: كان لازم أدخل وأشارك خاصة مع وقوع أحداث مهمة في بلدي، وآراء خطرة جدًا بتترمي عليها.

واستكمل: عايزين تعرفوا الطيبة بصوا في وشي، وكان نفسي أمي تشوفني في التليفزيون يوم وفاتها قعدت أبوس كل حتة في السرير اللي كانت نايمة عليه.