زوجة في محكمة الأسرة: جوزى بيعلم أولادنا يسرقوا موائد الرحمن فى رمضان

جوزى حرامى وخايفة عيالى يطلعوا شبهه.. بتلك الكلمات روت زوجة لـ تحيا مصر من داخل محكمة الأسرة قصة زوجها الذى أعتاد السرقة منذ سنوات كثيرة معتقداً أنه الطريق لتسهيل الأمور المادية وأصبح يعلم أطفاله السرقة أيضاً ليساعدوه مما جعل هذه الزوجة تشعر بإستحالة الحياة معه خوفاً على أطفالها من أن يصبحوا مثله ويتدمر مستقبلهم فققرت الأنفصال عنه ورفع دعوى خلع بمحكمة الأسرة.

علاقة جنسية وجريمة على السحور.. جثة شاب وأشلاء سيدة داخل شقة القاهرة

عشان ياخدوا راحتهم في الحرام.. الثلاثينية خططت وعشيقها أزهق روح زوجها في كفر الشيخ

جوزى بيسرق من صغره 

بدأت الزوجة حديثها لتحيا مصر قائلة: "أحنا متجوزين من 16 سنة وعندنا ولدين وجوزى يبقى أبن عمى وشغال مكوجى على قده ومن صغره وأحنا عارفين فى العيلة أن أيده خفيفة وممكن يسرق اى حد من غير ما يحس مرة سرق محفظة أخوه اللى كان فيها فلوس تعبان وشقيان فيها وأخوه وقتها فضل يتحسبن عليه لأنه خد فلوسه وساب البيت أسبوع ولما الفلوس اللى هو سرقها خلصت رجع تانى ومرة تانية سرق فلوس من والدته عشان يجيب بيها علبة سجاير ووالدته فى الأساس ملهاش اى مصدر دخل بعد وفاة جوزها وعايشة على المساعدات من الناس وهو بدل ما يساعدها كان بيسرقها ولما أنا كبرت أهلى جوزونى ليه وقالولى أنه هيتغير بعد الجواز وأنا عشان كنت قربت أدخل على سن التلاتين مكنش قدامى حل غير أنى أوافق".

اتجوزنا وبقى جايبلى الكلام من كل الناس 

وتابعت الزوجة حديثها :" أنا وجوزى بعد ما اتجوزنا بقى بيسرق أخواتى وأصحابى لما بييجوا عندى البيت، يسرق منهم تليفون او شنطة او جزمة من أخواتى الرجالة اللى محطوطة على الباب ويفضل يقنع فينا أن الحاجة هى اللى أختفت لوحدها وأنه أستحاله يعمل حاجة زى كدة لدرجة أن مبقاش حد منهم بييجى يزورنى  وبقى بيسرقنى أنا شخصياً أنا شغالة فى محل لعب أطفال والمرتب اللى باخده كذا مرة كنت الاقى جوزى نهبه كله ولما اواجهه يقولى انتى مراتى وده حقى ".

جه رمضان وبيعلم ولادى يسرقوا موائد الرحمن 

وأختتمت الزوجة :" رمضان لما جه السنة دى جوزى مكنش معاه فلوس يجيبلنا أكل يكفينا الشهر كله بسبب أن العيشة غليت وهو شغله على قده ففكر فى فكرة متخطرش غير على بال شخص حرامى ومبيخافش ربنا وهو أنه يعلم ولاده الأتنين اللى كبروا وبقوا فى سن المراهقة أنهم يعملوا نفسهم غلابة ويقعدوا يفطروا على موائد الرحمن بس قبل ما الناس تيجي كلها ويبقى العدد كبير يسرقوا الأكل اللى بيتحط فى شنط سودة وياخدوه ويمشوا لكن أنا كنت بستحرم لأن ده أكل ناس غلابة وربنا عمره ما هيرضى علينا طول ما أحنا بناكل أكلهم فقررت فى مرة أخد الأكل من عيالى وأنزل لمائدة الرحمن اللى سرقوها وأرجعلهم الأكل راح جوزى نزل فيا ضرب وقالى " لو مش عاجبك متاكليش لكن مفيش حاجة هترجع " من وقتها وأنا مقدرتش أقعد معاه فى بيت واحد ورجعت بيت أهلى وخدت عيالى بالعافية وهو نايم وجيت المحكمة ارفع عليه دعوى خلع بمحكمة الأسرة عشان أرتاح منه وأحمى ولادى أنهم ميطلعوش حرامية شبهه ".