حسن شاكوش: تامر حسني قالي وفر فلوسك ومراتي شيفاني عوض ليها

تحدث مطرب المهرجانات حسن شاكوش عن حفل زفافه وعن هجومه على ممتنعي حضور حفل زفافه، كما تحدث عن سجود زوجته له في حفل الزفاف.

تحيا مصر يرصد لكم تصريحات حسن شاكوش

وقال حسن شاكوش خلال لقائه في برنامج العرافة الذي يعرض عبر قناة المحور: أنا كلمت تامر حسني في التليفون في شغل وقولتله ده فرحي وأنا عايزك شغل شوف هتعمل معايا إيه وبعتلي قالي ألف مبروك والدنيا غليت ووفر فلوسك وجالي من غير مقابل بفرقته.

وعن هجومه ضد ممتنعي فرحه قال شاكوش: أنا بحب الناس دي وكنت بتمنى يكونوا موجودين ودي طريقة تعبير عن زعلي وممكن الناس تفهمني غلط وبهدد بس دي طريقتي وطريقة كلامي

وأضاف: لو فرحي فيلم وشو هجيب أي واحدة من الشارع أو اي زميلة ليا وأعمل الفيلم ده من غير المصاريف دي كلها

حسن شاكوش: واحدة بعتت لمراتي في الصباحية أني بخونها وهتجوز واحدة تاني

وكشف شاكوش: يوم الصباحية واحدة بعتت لمراتي  بتقولها انتي صعبانه عليا عشان حسن بيحب واحدة تانية وهيتجوزها ومفهم التانية أن الفرح ده كله فيلم وقررت اقفلها السوشيال ميديا بسبب كده.

حسن شاكوش عن سجود زوجته: متوقعتش أن هي تعمل كده وشيفاني عوض ليها

وتابع: مراتي مش بتسجد ليا واللي عايز يسجد لأي حد يسجد وأنا متوقعتش من ريم أن هي تعمل كده وهي ممكن تكون في دعوة بينها وبين ربنا وشيفاني عوض ليها وإني الإنسان اللي هي بتتمناه

حسن شاكوش: مفيش بين راجل ومراته كرامة

وأضاف: حسيت بإحساس  حلو جدًا لما مراتت سجدت لربنا عشان اتجوزتني و ده مش عيب وبين اي راجل ومراته مفيش حاجه اسمها كرامة.

واستكمل: مراتي ست متفاهمة وقريبة من ربنا ومش بتسيب فرض ومش بتاخد كل حاجة بعصبية وملهاش في الشو والإعلام وعارفة طبعي وهي بنت منطقتي.

تصريحات حسن شاكوش

وسبق ووجه مطرب المهرجانات حسن شاكوش رسالة إلى من امتنعوا عن حضور حفل زفافه وقال في لايف عبر حسابه بموقع تبادل الصور والفيديوهات انستجرام:  اللي مش هتحتاج قفاه دلوقتي هتحتاج وشه بعدين، وأي حد أنا عزمته وهو كان فاضي ومجاش ده مووضع تاني وكلنا في الأخر في مركب واحدة، الناس اللي جتلي الفرح أنا مكتفي بيهم الواحد زعل واتصدم أن في ناس كانت قريبة ومجتش الفرح.