شريف منير: لولا قسوة أبويا عليا كنت زماني في حتة تانية وأمي كانت بتشيل مشاكلي على كتافها

حل الفنان شريف منير ضيف على برنامج “أنا والقناع”، الذي تقدمه الإعلامية منى عبد الوهاب على شاشتي قناة الحياة وسي بي سي، وفجر خلاله مجموعة من التصريحات الجريئة عن والدته ووالده.

تحيا مصر يرصد في ذلك التقرير تصريحات شريف منير 

وقال شريف منير عن والده: “كنت بحب والدي وبحترمه وأنا من الجيل اللي اتربى على احترام الكبير والجار فكنت بعمل حساب لأبويا، والقسوة أحيانا بتبقى مطلوبة بس مش لدرجة إنها تسيب أثر جوة الشخص ويعمل عقدة وأنا نسخة من والدي بس متطور”.

شريف منير: القسوة بيني وبين ولادي مفيهاش ضرب ومفتقد أبويا

وتابع: “القسوة اللي بيني وبين أولادي مفيهاش مد إيدين أو ضرب والجيل بتاع دلوقتي مينفعش يتضرب وبيبقى فيه اقوى من الضرب وهو الخصام ده أقوى من الضرب”.

وأضاف: “بعد ما أبويا مات وكبرت وخلفت وبفتكر الأيام اللي حصلت بيني وبينه بقول عنده حق ولو مكنش عمل كدة كانت هتبقى حياتي تانية خالص أنا بحبه بكل ما فيه أنا مفتقده”.

شريف منير: أمي كانت بتشيل مشاكلي على كتافها

كما تحدث شريف منير عن دعم ولدته له، فقال: “أمي كانت بتشيل مشاكل على كتافها بسببي ودفعت ده تمنة كتير وهي أكتر حد في حياتي شجعني على الفن من بداية ما بدأت لحد ما احترفته، وأمي ملحقتش تشوفه ودعمت وماشفتش”.

وعن خوفه من المجهول، قال شريف منير: “مبخفش من المجهول ومليش دعوة بالغيب وأهم حاجة عندي إني مبقاش تقيل على حد لما الدنيا تبوظ مش عايز أضايف حد ولا أبقى تقيل على حد”.

وتابع: “ساعات الخسارة بتبقى مكسب، ومرة كان فيه خلاف بيني وبين حد من الوسط كبير دار على السوشيال ميديا ولو كنت كملت في إني أخد حقي منه كنت هخسر، ردلي اعتباري وتم الاعتذار ليا”.

أخر أعمال شريف منير

يذكر، أن أخر أعمال شريف منير مشاركته في مسلسل إيجار قديم رفقة ميمي جمال، فيدرا، محمد الشرنوبي، صلاح عبدالله، هشام إسماعيل، حازم سمير، رحمة حسن، إلهام وجدي، بسمة داود، حنان سليمان، محمد نشأت، علاء زينهم، محمد غنيم، ومن تأليف عمرو الدالي وإخراج طارق رفعت وإنتاج كريم أبو ذكرى.