أحمد العوضي: بحب أشتغل مع ياسمين لأن الشغل بينا مُريح وفي كيميا حلوة

تحدث الفنان أحمد العوضي عن علاقته بزوجته ياسمين عبد العزيز في العمل، كاشفًا بأنه يحب العمل مع ياسمين على عكس أي ممثل آخر.

تحيا مصر يرصد لكم تصريحات أحمد العوضي

أحمد العوضي:  الكيميا بيني أنا وياسمين حلوة والشغل بينا مُريح

وقال أحمد العوضي خلال لقائه في برنامج إي تي بالعربي: احنا بنحب نشتغل مع بعض، أنا بحب اشتغل مع ياسمين، ياسمين بتحب تشتغل مع عوضي، الكيميا بينا حلوة، الشغل بينا مريح.

أحمد العوضي: ببقى شايل هم ياسمين واحنا بنشتغل سوا وفي علاقة حميمة بينا في العمل

وتابع: أنا ببقى شايل هم ياسمين زي ما ببقى شايل همي وهي بتبقى شايلة همي برضو وبيبقى الموضوع كويس.

وأضاف: لما بشتغل مع حد تاني مش بيبقى بنفس الحميمية حتى لو هو حبيبي أو أخويا أو اختي أو زميلتي عمرها ما هتبقى بنفس الحميمية بنفس اتنين متجوزين. 

وعن أمكانية تقديم فيلم سينمائي يجمعهم قال العوضي:  ممكن بس مش دلوقتي بس ياسمين عندها فيلم هتعمله بعد العيد،  وأنا عندي فيلم البلدوزر مع طارق العريان ودي خطة مؤجلة.

تصريحات أحمد العوضي

وسبق وتحدث أحمد العوضي عن نجاح مسلسل ضرب نار قبل عرضه وقال: “الحمد لله المسلسل مسمع في الشارع، وأصحاب المهن الحرة كلهم مرتبطين بشخصية جابر الكوماندا، وده نجاح مسبق والمسلسل عمل تفاعل كبير.. كنا متوقعين نجاح البرومو”.

وأضاف: لما اختارنا إن جابر يكون صياد صقور، كلمت مصطفى النبوي من أجمد الصقارين اللي في مصر، اتعلمت منه التعامل مع الصقر ازي لأنه طائر جارح، لحد ما وصلنا للمشهد اللي هو واقف على كتفي وأنا سايق المكنة، إن يوقف على كتفك دي مش سهلة عشان كدة عملت دوشة شوية على السوشيال ميديا”.

مسلسل ضرب نار

مسلسل ضرب نار من المقرر عرضه في السباق الرمضاني المقبل 2023، ويشارك في بطولته عدد كبير من نجوم الفن ومنهم: ماجد المصري، أحمد العوضي، دنيا المصري، ياسمين عبد العزيز بدرية طلبة،  إسراء رخا، أحمد غزى، ايمان السيد، والعمل  من تأليف ناصر عبد الرحمن وإخراج مصطفى فكرى وإنتاج شركة سينرجي.