زوجة داخل المحكمة: «جوزي طردني من البيت عشان عملته سمك وأخته مش بتحبه»

أخت جوزي من ساعة ما اتطلقت وهى قاعدة عندنا واتطردت من بيتى بسببها... بتلك الكلمات روت زوجة لـ تحيا مصر من داخل محكمة الأسرة عن زوجها الذى طردها من المنزل بدون صدور أي خطأ منها متدعى أنها تعامل بشقيقته بقسوة .

جوزي دخل عليا بأخته وقالي هتعيش معانا 

بدأت الزوجة حديثها لـ تحيا مصر :" أنا وجوزي متجوزين من 16 سنة وعندنا ولدين جوزى يعنده أخت واحدة أصغر منه ووالده ووالدته متوفيين وهو متعلق بيها  ودايماً بيقولى "مليش غيرها فى الدنيا" وهى كمان متعلقة بيه وعشان كده مبتعرفش تحبني لأنها بتحس أنى واخداه منها وبتغير عليه مني دايماً هى كانت متجوزة وعايشة فى بيتها بعيد عننا لحد ما أختلفت مع جوزها وأتطلقوا ولقيت جوزى داخل عليا بيها وبعيالها وبشنطهم وبيقولى " أختى هتعيش معانا عشان ملهاش مكان غير عندنا تروحه وأنا مش هسيبها فى أزمتها ".

كنت راضية بيها بس هى كانت عايزانى أتطلق وأحصلها 

وتابعت الحديث :" أخت جوزى قعدت عندنا سنة كنت أنا اللى بخدمها وبخدم ولادها عشان الأزمة اللى هى فيها وعمرى ما خليتها تساعدنى فى حاجة وبالرغم من كدة كانت على طول بتسخن جوزى عليا وتقوله انى مش بأكلها ولا بشربها وأنى باخد هدومها وأنى بخليها تكنس وتمسح طول الوقت من غير راحة عشان أطفشها هى وعيالها من بيتى وكان جوزى دايماً يضربنى بسببها ويهددنى بالطلاق ويقولى " أنتى تتعوضى تانى لكن أختى مش هعرف أعوضها " وأنا كنت بسكت عشان بيتى ميتخربش وكنت بلاقيها بتقولى لما بنبقى لوحدنا وجوزى مش موجود  " أنا مش هسيبك غير لما أخويا يرميكى فى الشارع ويطلقك زى ما جوزى عمل فيا ".

بيتى أتخرب بسبب أكلة سمك 

واختتمت الزوجة الحديث : جوزى فى مرة كان مدينى مصروف البيت وقولت أعمل بيه أكلة سمك ومكنتش أعرف أن أخته مش بتحبه وبتقرف منه وهى لما شافتنى واقفة فى المطبخ وبعمله مقالتليش ولا عرفتنى اى حاجة لحد ما جوزى رجع من شغله وفوراً أخته جريت عليه وقالته " الحق مراتك صممت تعمل سمك عشان تسيبنى جعانة ومتأكلنيش ولما طلبت منها تعملى أكل على جنب قالتلى هتاكلى من اللى موجود ولو مش عاجبك أمشى " راح جوزى ضربنى بسببها ومشانى من البيت وخد عيالى منى وقالى " حرام عليكى أنتى ست أنانية وعايزة تضيعى منى أختى اللى مطلعتش من الدنيا غير بيها ومن وقتها وأنا برفع عليه دعوى طلاق للضرر ودعوى تسمكين وضم صغار ومش مصدقة أن أخرة حبى لجوزى وعشرتى معاه تنتهى بأنه يرمينى فى الشارع وميسألش حتى فيا  وكل ده بسبب أخته اللى ظلمتنى وخربتلى بيتى وقعدت هى فيه متهنية ".