ياسمين غيث تكشف تفاصيل حالتها الصحية: العملية مكانها صعب والألم مش طبيعي

كشفت الفنانة ياسمين غيث عن تطورات حالتها الصحية، وذلك بعد خضوعها لعملية جراحية لإزالة ورم حميد جديد، واحتجازها في المستشفى.

تحيا مصر يرصد لكم تطورات الحالة الصحية لياسمين غيث

ونشرت ياسمين غيث صورًا لها أثناء خضوعها للعملية وذلك عبر حسابها بموقع تبادل الصور والفيديوهات انستجرام: عارفة إنكم قلقانين عليا ومش عايزة اتأخر عليكم أكتر من كده رغم تعبي لسه.

وأضافت: مبدئيًا ده شكلي معظم الـ 5 شهور اللي فاتوا...من شهر 11 حتى الآن، الحمد عملت العملية يوم ٦/٢ (عملية open chest لإزالة ورم حجمه ٨ سم+) الحمد لله ألف حمد وشكر طلع حميد وطلع إنه كتلة من الغدة الدرقية وده هيحتاج إني أعمل فحوصات وcheck up علي الغدة كل 3 شهور، ده طبعا غير الـgeneral check up اللي بعمله كل 6 شهور. الحمد لله علي كل حاجة.

وتابعت: عاملة إيه؟ تعبانة...حاسة بإيه؟ ألم لا يحتمل...في عضمي، في ضلوعي، في أعصابي.. بس كدة؟ لأ.. العملية مكانها صعب والفتح في عضم الصدر ألمه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا؟ أنا من 7 سنين عملت عملية الـ breast cancer اللي شالوا فيها من صدري اليمين جزء من العضلة، ومعظم الغدد (lymph nodes) اللي تحت الذراع وده أثر من وقتها على ذراعي اليمين وفضل كذا شهر بيوجعني وبعد كدة كمّل معايا التنميل والوجع بس محتمل.

ياسمين غيث: فضلت يومين مش عارفة استخدم ايدي

وتابعت: بعد العملية الأخيرة، فهمت إن الفتح في نص القفص الصدري والقطع في العضلة دي والعضم والأعصاب، بيأثر علي الذراعين، لأن معظم قوة حركتهم بتكون من عضلة الصدر. فضلت حوالي أسبوعين مش عارفة استخدم إديا الإتنين خالص، شوية بشوية مع العلاج الطبيعي بقيت عارفة استخدم الشمال في حاجات بسيطة واليمين برده لأ والألم في ضلوعي ودراعي وكتفي ورقبتي اليمين غير محتمل لدرجة إن الدكاترة بيدوني مسكنات جدول لازم يدوهالي من المستشفي...لغاية ما الدكاترة قالولي للأسف نصك اليمين بدراعك اليمين هيكون متأثر أكتر بسبب عملية الbreast cancer القديمة اللي أصلا سايبة أثر علي ذراعك فمعلش مافيش حل غير إنك تستحملي وتاخدي مسكنات للألم وعلاج طبيعي لغاية ما يرجعلك ال range of motion والإحساس تاني بنسبة كبيرة. الحمد لله علي كل حاجة، بس قلت أحكي لكم كدة وده ملخص لتفاصيل كتييييير قوي صدقوني منها إني بيغمي عليا من الوجع وغيره.

ياسمين غيث: حبيت أعرفكم أنا بعدي بإيه

وأردفت ياسمين غيث: أنا مش بحب أحط صور كدة بس حبيت أعرفكم المرة دي أنا في إيه وبعدي بإيه وشكلي عامل إزاي حاليا والجرح شكله إيه علشان ماتتخضوش لما تشوفوني لأن أنا من كتر وجع الجرح كمان والـirritation اللي فيه مش بستحمل هدوم عليه فحتى في عز البرد بكون مش حاطة أي هدوم عليه علشان مش بستحمل. فماتخافوش من شكله.

ياسمين غيث تطلب من جمهورها الدعاء لها

واختتمت: ادعوا لي أرجع زي الأول، أنا بقى لي 5 شهور عملت فيهم 4 عمليات بين المستشفيات والعناية المركزة والدكاترة والفحوصات وأوجاع لا تحتمل والله، ادعوا لي علي الأقل أرجع أعيش من غير ألم تاني. أنا الحمد لله بتحسن بالعلاج الطبيعي بس ببطأ شوية.