ياسمين عز: جوزك هو المنتره بتاعك ونعمة من ربنا عليكي

غازلت الإعلامية ياسمين عز الرجل المصري كعادتها ووصفته بأنه من نعم الحياة، كما حرصت على تزجيه بعض النصائح للسيدات للتعامل مع الزوج.

تحيا مصر يرصد لكم تصريحات ياسمين عز

وقالت ياسمين عز خلال برنامجها كلام الناس الذي يعرض عبر قناة أم بي سي مصر: جوزك هو المنتره بتاعك ومفيش أحلى من القاعدة جنب فرعونك في رمضان، وقعدتك جنبه وحواليه خروجة لوحدها.

وغازلت ياسمين عز الرجال وقالت:عندنا في الحياة نعمتين الأولى الراجل والتانية الأكل والشرب.

وتابعت ياسمين عز: قولي لجوزك اعملك إيه يا حبيبي يا نور عيني ويا فرعوني يا ماكلني يا مشربني يا مهنني على الفطار ودي الصيغة الصح للسؤال عشان هينسى من الشعر اللي اتقال فيه.

واستكملت ياسمين عز: عمرك ما هتلاقي زي الفرعون المصري لأن أكلك بيبقى محروق والرز معجن وهو مش بيرضى يحرجك وبيقولك تسلم إيدك عشان بيحبك.

ياسمين عز: متتفرجيش على المسلسلات في رمضان من غير جوزك

وأضافت: مش عشان انتي قاعدة في البيت تتفرجي على المسلسلات من غير جوزك ويجي بليل تحرقيله أحداث المسلسل لأنها حركة مستفزة ومتتفرجيش على المسلسلات من غيره.

ياسمين عز: الرجالة بتتفرج على المسلسلات عشان تخلص من زن الست

واستطردت: جوزك بيفتح حلقة المسلسل عشان تستكتي شوية من الزن طول اليوم وهو بيتفرج بيتفضل يفكر هيجيبلك إيه ويعملك إيه ومش بيتفرج.

ياسمين عز: محبكتش تقولي لخطيبك بحبك في نهار رمضان

ووجهت نصائح للسيدات وقالت: بقالي 11 شهر بقولك يا شيماء عاملي خطيبك كويس وانتي بتعانديني وبتيجي في رمضان تسألي الشيخ لو قولت لخطيبي بحبك قبل الفطار يبقى أنا فطرت وانتي فاكرة أنك بتستفزيني بس أنا برضو هقف في صالح الفرعون.

واستطردت: الموضة ظهرت أن انتي تفطري عند مامتك وجوزك يفطر عند مامته كأنكوا منفصلين، وده مينفعش لأنه ميصحش تدخلي عند مامتك من غير جوزك فرعونك لأنه بيمشي يحرسلك الطريق، و مينفعش تسيبي فرعونك يفطر لوحده أول يوم رمضان، وكل واحده من اخواته هتهتم بجوزها وحماتك هتهتم بالفرعون الأكبر حماكي وجوزك مفيش حد مهتم بيه.