لأول مرة.. منى فاروق تخوض تجربة تقديم البرامج الحوارية ببرنامج «آي سي Eye See»

تخوض الفنانة المصرية منى فاروق تجربة تقديم البرامج الحوارية لأول مرة من خلال برنامج «آي سي Eye See»، والمقرر عرضه بعد موسم عيد الفطر المبارك.

تحيا مصر يرصد خوض منى فاروق تجربة تقديم البرامج.

برنامج Eye See

ويعد برنامج “Eye See” من البرامج الحوارية الاجتماعية في إطار ترفيهي مرح، وتستضيف خلال حلقاته نخبة من نجوم الوسط الفني وأبرز مشاهير السوشيال ميديا.

وقالت منى فاروق عن هذه التجربة: “متحمسة لتجسيد شخصيتي الحقيقية في تقديم البرنامج عبر التلقائية وخفة الدم مع الضيوف، والبرنامج يمثل تجربة ممتعة في مناقشة الصراع الأبدي بين الرجل والمرأة وعدة مواضيع اجتماعية وحياتية في إطار ترفيهي وخفيف وملئ بالسخرية والضحك”.

أزمة منى فاروق الأخيرة

وعن أزمتها الأخيرة، قالت منى فاروق لـ تحيا مصر: بحاول لحد النهارده اخرج من الإبتلاء، وبقالي ٤ سنين متعايشة معاه، وبحاول اتعافى وابقى موجودة، والحاجات مع السنين بتمر وبتتنسي، وبحاول ارجع اشتغل وانجح واقف على رجلي، وهفضل احاول.

رسالة منى فاروق للجمهور

وتابعت: انا يا جماعة عايزة انجح، احكموا عليا من شغلي والشاشة، متحكموش عليا من حياتي الشخصية ومتظلمونيش، ومستاهلش الظلم عشان كلنا بنغلط وبنرجع لربنا.

واستطردت: هي ابتلاء كبير واللي ربنا بيحبه بيبتليه، وقولت اني كان في جواز في الفترة دي، بس أنا اتعرضت لظلم كبير وجلد وناس جرحت فيا وفي أهلي، وحكموا عليا بالإعدام وأنا على وش الدنيا، وحسبي الله ونعم الوكيل في كل إنسان ظلمني.

وأضافت: لما بشتغل بتبقى كل حاجة تمام، واللي مخليني مبشتغلش الابتلاء اللي اتعرضلته وحسيت إني منبوذة وده أثر فيا جدًا، وتعبت نفسيًا إني بعافر مع الدنيا، وربنا بيقويني إني اشتغل وعايزة اقف على رجلي.

واختتمت منى فاروق حديثها قائلة: أنا بشتغل بره مصر وبشتغل في لبنان ودبي بس أنا عايزة اشتغل في بلدي مصر وملهاش علاقة بالماديات.. أنا عايزة أخدم بلدي وعايزة أرجع أعمل أدوار تاني في مصر أنا بحب بلدي وبحب شعبها ورئيسها ونفسي ابقى موجودة.