تامر هجرس: عادل إمام قالي أنا مش عايزك تمثل.. وكنا بناكل في التجربة الدنماركية بشكل هيستيري

كشف الفنان تامر هجرس عن تفاصيل كواليس فيلم التجربة الدنماركية، وذلك خلال لقاء له ببرنامج أسألني على الصفحة الرسمية لقناة سي بي سي.

تحيا مصر يرصد تفاصيل تصريحات تامر هجرس

حيث قال هجرس: أول مشهد في فيلم التجربة الدنماركية صورناه كان ما بيني وبين الأستاذ عادل إمام، احنا كنا على علاقة كويسة قبل الفيلم بشهر كنا بنروح نتغدى مع بعض ونخرج مع بعض، فهو كان عارف تامر كتامر هجرس.

كواليس التجربة الدنماركية

وتابع: فأنا كنت قلقان جدًا وأنا بمثل قدامه، صوتي مكنش طالع تلقائي، فقالي لا أنا مش عايزك تمثل أنا عايز تامر اللي أنا أعرفه بالطريقة بتاعته، من ساعتها فكني في أول جملة، ودايما هفتكر المشهد دا.

وعن مشاهد الأكل قال: كنا بناكلها بجد مش دايما، بس كنا بناكل الأكل دا فطار قبل التصوير، كنا بناكل أكل هيستيري قد الأكل دا وأكتر كمان، ولو كنا مش فطرانين كنا بناكل اللي في المشهد على طول.

لغات تامر هجرس

وفي الحلقة ذاتها، كشف الفنان تامر هجرس عن أصوله الغير مصرية، وعدد اللغات التي يتحدث بها، وذلك خلال لقاء له ببرنامج أسألني على الصفحة الرسمية لقناة سي بي سي.

حيث قال تامر: عندي جدة من سوريا وجدة من إنجلترا بس أبويا وأمي مصريين، عندي جنسية تانية بس مش هقول، وتكلم إنجليزي وعربي وبفهم فرنساوي واتعلمت إسباني وبمشي حالي يوناني.

وتابع: اتعلمت أسباني وفرنساوي في المدارس، واليوناني عشان كنت بروح اليونان كتير جدا، ودلوقتي بروحها أكتر، وإنجليزي عشان جدتي إنجليزية فكنت بتكلم إنجليزي كتير أوي في البيت، والعربي عشان احنا مصريين.

تامر هجرس: بعمل مديتيشن بقراءة القرآن 

وفي وقت سابق، كشف الفنان تامر هجرس خلال لقائه ببرنامج الستات عن تفاصيل المدتيشن الذي يحرص عليه، مشيرًا أنه يكون بقراءة القرآن الكريم. 

وقال تامر هجرس: بعمل مديتيشن إني بقرأ قرآن كتير.. النبي آدم محتاج 10 دقايق بس مدتيشن في اليوم.

وتابع: وانا بالنسبة ليا المدتيشن بتاعي قراءة القرآن وفي تسبيح ودعوات.. أنا مش ملاك وفيا عيوب كتيرة جدًا بس بعمل كده.. يمكن بحاول اعمل توازن.