الشاعر عمرو حسن: أنا مريض اكتئاب وادعولي متهورش في أي فعل هاخده

أعلن الشاعر الشهير عمرو حسن عن دخوله في حالة اكتئاب شديدة تمنعه عن إحياء حفلات شعرية في الفترة الأخيرة الماضية، كما أنه غير مستعد أيضا لإقامة حفلات خلال الفترة المقبلة.

تحيا مصر يرصد في ذلك التقرير تصريحات عمرو حسن ومرضه بالإكتئاب

عمرو حسن: أنا مريض اكتئاب من سنوات طويلة والموضوع باخ 

وكتب عمرو حسن عبر حسابه الرسمي بموقع التواصل الإجتماعي “فيسبوك”: “لا أخفيكم سراً انا مريض اكتئاب من سنوات طويلة، والموجة بتعلى وتنزل بيا فترة عن فترة، بس من شهور وانا موضوعي باخ والحكاية رزلت شوية، اكتر شيء كان بيهون عليا مقابلتي بيكم في حفلاتي وكلامي معاكم والشعر اللي بكتب”.

عمرو حسن: أنا في فترة توقف عن الحفلات وادعولي ماتهورش في أي فعل

وتابع: “دلوقتي انا في فترة توقف عن الحفلات ودايرة معارفي ضيقه جداً جداً ومابحبش ارهق حد معايا واشغله بيا، في طلبي منكم ماتنسونيش في دعواتكم ان ربنا يحفظني من اي قرار هاخده او اي فعل اتهور فيه او اي شيء ممكن اعمله بسوء تصرف وبدون حكمه، والقاكم على خير”.

الرابر أفرو وأزمته مع الإدمان

هذا وخرج الرابر أفرو وتحدث عن معاناته هو الأخر ولكن ليس مع الإكتئاب إنما مع الإدمان، حيث قال: للاسف بقالي سنة ونص بعاني من الادمان، وخسرت تقريبًا كل حاجة، بعد ما صرفت فلوسي كلها على المخدر ده بدأت اخد فلوس من صحابي على اساس اني هرجعهم بليل بمصلحة وكده، بس طبعًا مكنتش برجع حاجة.. لما استغليت كل صحابي وخلصوا كنت لسه بردو بموت من الالم وان لازم اتصرف في فلوس عشان اجيب المخدر ده.

وتابع: مؤخرًا بدأت اكلم ناس من الفانز بتوعي اقولهم ان في مصلحة معايا هيستفادو منها مطلوب منهم بس 300 جنيه وبعد ساعة هبعتلهم انا 1500 جنيه وطبعًا مكنتش برجع حاجة.. انا جاي النهارده اعترف على نفسي اني مدمن بقالي سنة ونص وكدبت وخدت فلوس من ناس كتير، بس والله ده كان غصب عني لما كان الوجع بيتملك مني كنت بلاقي نفسي بعمل اي شئ واكدب بأي طريقة عشان اجيب فلوس واتعاطى.

واختتم: اتمنى من الناس اللي انا اذيتها انها تعفو عني لحد ماخلص رحلة علاجي اللي هتبدأ من بكره واقسم بالله هعوض الناس دي كلها بس سامحوني عشان اقدر اسامح نفسي، انا عمرو سليمان مدمن ومعترف بكل اخطائي ارجو منكم السماح والدعاء.