في أول ظهور إعلامي لها بعد أزمتها مع زوجها.. علا غانم تنهار باكية: عايزة أخف وحقي يرجعلي

تحل الفنانة المصرية علا غانم، اليوم الإثنين الموافق 13 مارس ضيفة على برنامج صبايا الشمس للإعلامية ريهام سعيد في أول ظهور إعلامي لها بعد أزمتها مع زوجها، وذلك في تمام الساعة التاسعة مساءً.

تحيا مصر يرصد موعد حلول علا غانم ضيفة على ريهام سعيد.

علا غانم مع ريهام سعيد

وظهرت غانم في البرومو الرسمي للحلقة وهي تنهار باكية: مش عايزة اسمع صوته ولا أشوفه.. عايزة اخف وواثقة أن حقي هيرجعلي.

تطورات الحالة الصحية للفنانة علا غانم

كشف الدكتور أشرف زكي، نقيب المهن التمثيلية، عن تطورات الحالة الصحية للفنانة علا غانم بعد دخولها المستشفى.

وعن انتقادات الموجهة له لعدم التدخل في أزمة علا غانم مع زوجها قال “زكي”، في لقائه مع ET بالعربي، “أنا متأخرتش وكنت متواصل معها من أول لحظة، ومش شرط يكون ده معلن”.

وتابع نقيب المهن التمثيلية “لكن أنا من أول دقيقة بتكلم معها ومتابع معاها، وزرتها في المستشفى، لكن مش كل شيء بنعمله بنعلنه، وإحنا متابعين معها لحظة بلحظة”.

وأكد نقيب المهن التمثيلية “لا نترك أي فنان في محنة، سواء نقابي أو غير نقابي، ولكن لينا حدود في التدخل مش أي حاجة نقدر نتدخل فيها بقوة”.

وأوضح أنه زار علا غانم في المستشفى للاطمئنان عليها، مشيرًا إلى أنها تعاني من ارتجاج في المخ وكسر في الضلع.

واختتم أشرف زكي: نتمنى لها السلامة والأزمة تعدي على الخير لأنها أخت عزيزة وفنانة وصديقة غالية علينا.

أزمة علا غانم مع زوجها

وقالت علا غانم في تصريح خاص لموقع تحيا مصر: يوم 9 نوفمبر 2022  اترمى على بيتي مولوتوف وبنزين  وبلغت البوليس واتقبض على اللي عمل في بيتي كده وطلع تبع طليقي.

وأضافت: طليقي بعتلي رسائل تهديد وقالي لو مطلعتيش الولد اللي اتحبس هنموتك وأخرك رصاصة  أو ماية نار يترموا في وشك اللي فرحانة بيه، وسب وقذف وتهديد بالتشهير منه، وعملت فيه محضر في مباحث الانترنت.

وأوضحت علا:  يوم الجمعة بعد الصلاة لقيت 13 راجل  وخمس ستات  اتهجموا عليا واقتحموا البيت وتعدوا عليا وعلى أمي بالضرب والسحل وأمي حصلها إصابات وجسمي كله علامات ومتأجرين من طليقي، وبعد ما بلغت البلوليس اكتشفت أنهم أهل الولد اللي اتقبض عليه ومتأجرين بقيادة زوجي السابق

وقال زوج علا غانم في تصريح خاص لموقع تحيا مصر: أنا مش محتل البيت وقولتها تنور في بيتها في أي وقت أنا معنديش مشكله معاها.. أنا اللي انضربت واتعورت وايدي مفتوحة، هي ضربتني بازازة وأمها بحديدة والبلطجية اللي هي جيباهم جرجروني على الأرض وضربوني على رجلي بعصيان.

وتابع: هي رافعة قضية خلع بقالها سنة ونص لا أعلم شئ عنها وقدمت أوراق مزورة للمحكمة، عايزين يطردوني برا البيت وأنا البيت معايا عقد إيجار بيه 59 سنة.. هي لو عايزة تتطلق مطلقتش في أمريكا ليه.

وأضاف: ليه جاية مصر وتعمل دوشة عشان عايزة ترجعي تمثلي تاني في مصر، الطلاق في أمريكا أسهل بيبقى خلال 6 شهور، انتي عايشة معايا بقالك سنة ونص بتنامي معايا وبتشربي معايا وعملنا عيد جوازنا من 3 شهور 
وفجاة الاقيكي عملالي خلع وعايزة تاخدي البيت.

واستطرد: عايزة تتطلق اهلا وسهلا بس اديني حقي، في 2005 كنت جايبلها شبكة ب 2 مليون جنية من أمريكا لأن والدها قالي أنا مش هعملك مؤخر ومش هعملك مقدم وانت تجيب شبكة تليق بمركزك قولتله مفيش مشكلة وعلا لما اتجوزتها كانت جيالي بتاكسي محليتهاش حاجة ولا حتى عربية.

وأردف: تاني يوم نزلت اشتريتلها عربية وعيشتها في فيلا، وهي مكنتش تعرف يعني ايه فيلا كانت عايشة في شقة صغيرة، أنا كنت سبب رزق كبير لي وربيت ولادها وبقوا أمريكان وعملتلهم بيزنس لحد ما أمها جت من أستراليا بدأت المشاكل فعلا حبت ترضي أمها وبنتها.

واختتم زوج علا غانم حديثه قائلًا: هي عايزة تطلق تاخد حقها وتديني حقي، الموضوع بينا وصل لمحاضر والشرطة تدخلت، أنا معنديش مانع نحل الموضوع ودي لو عايزة نقعد مع محامين وكل واحد ياخد حقه، احنا عندنا في أمريكا الست بتمتلك نص كل حاجة والراجل بيمتلك نص كل حاجة.. هي بتمتلك نص حاجتي وأنا بمتلك نص حاجتها وياريت الموضوع دا يطبق في مصر لأنه قرار ناجح.