كريم العدل: اتعودنا على الهجوم.. ومفيش بني آدم سوي على الأرض

حرص المخرج كريم العدل الرد على كل الانتقادات التي وجهت لمسلسله الأخير أزمة منتصف العمر، وذلك خلال لقاءه اليوم ببرنامج أسرار النجوم الذي تقدمه الإعلامية إنجي علي ويذاع على محطة راديو نجوم إف إم.

تحيا مصر يرصد تفاصيل تصريحات كريم العدل في أسرار النجوم

نهاية مسلسل أزمة منتصف العمر

حيث قال العدل عن الانتقادات التي طالت نهاية المسلسل: اتعاملنا مع المعالجة والفكرة إنها تراجيديا أو المأساة الإغريقية، ودا اللي مشينا عليه زي هاملت أو روميو وجوليت، والمأساة لازم تكمل في النهاية، عمرك ما تكوني منطقية لو الأبطال سافروا أو عاشوا حياتهم بعد ما كل اللي عملوه.

وتابع: وبحثنا عن النهاية المنطقية لكل شخصية، وفكرة النهاية المتشابهة متقدمتش في موعد على العشاء بس، ولكن اتقدمت بردو في غرام الأفاعي، ولكن كان هدفنا هو موعد على العشاء اللي قدمه الراحل العظيم محمد خان، ومكنتش متخيل نهاية تانية للمسلسل، ومشهد النهاية 15 دقيقة ونص الحلقة البطلين بيتكلموا على اللي عملوه.

الهجوم على أزمة منتصف العمر

عن الهجوم الواسع الذي تعرض له المسلسل فور عرضه، قال العدل: إحنا اتعودنا على الهجوم من وقت بحب السيما والشيخ جاكسون، والناس دلوقتي، بتعترض على صورة لفنانة في بوستر، ووجهة نظري إن السوشيال ميديا ادت أصوات لناس عايزة الهجوم لمجرد الهجوم.

وتابع: وحتى مسلسل كوميدي زي بالطو ناس طالبوا بوقفه وكأن التريند بقى هدف للبعض فقط، وبقالنا 15 سنة فيه موجة غير مفهومة، وأنا مش ضد نوعية دراما الأسرة ولكن لا يعقل أن تكون هي السائدة بس لازم يكون فيه تنوع.

كريم العدل: مفيش بني آدم سوي على الأرض

واستكمل كريم العدل رده على الهجوم قائلا: في المعهد كنا بندرس علم نفس وأنا والدتي طبيبة نفسية وعشان كدا بحب المنطقة دي، وأعتقد مفيش بني آدم على الأرض سوي وكل شخص عنده تراكمات جات من الأهل والتربية ونشأته.

وتابع: وعشان كدا في المسلسل كنا بنحاول نشتغل على النقطة دي، وأي كانت الشخصية فتأتي في لحظة تكرهيه ثم تتعاطفي معها أو تفهمي ما أوصله لهذه المرحلة.