حورية فرغلي عن مشهدها مع الطفل في مسلسل حكايات بنات: مكنتش بمثل والمشهد كان من قلبي

كشفت الفنانة حورية فرغلي عن كواليس مشهد ولادة الطفلة في مسلسل حكايات بنات، كما كشفت عن بعض الأسرار في حياتها الشخصية.

تحيا مصر يرصد لكم تصريحات حورية فرغلي

وقالت حورية فرغلي في خلال لقائها في برنامج مساء دي أم سي والذي يعرض عبر قناة دي أم سي وتقدمه الإعلامية إيمان الحصري: كان عندي مشاكل في الرحم والدكتور قالي هشيل الرحم وزعلت وعيطت وبعد يومين المشهد ده كان موجود ومستنية صاحبتي تولد وتديني البيبي.

حورية فرغلي: المشهد مكنش موجود في السيناريو

وتابعت: وده مكنش موجود في السيناريو وكان بيبي عنده يومين وكان أول مرة أمسك بيبي والمخرج قالي ارتجلي لمدة 10 دقايق.

واستكملت: نسيت أنا فين وكل اللي في دماغي كلام الدكتور واتكلمت مع البيبي على أنه واحدة صاحبتي وجه في حته حساسه ومعرفش الكلام طلع ازاي وكان مشهد من قلبي ومكنتش بمثل وكان شعور جميل.

حورية فرغلي: بحب أقرا في الجرايم

كما كشفت حورية عن طقوسها وقالت: أنا بنام بدري بصلي وبقرأ قرآن وبشوف الأخبار الجديدة وبقرأ الجرايم بعشق المزيكا وبعشق شرين واليسا وحماقي وجورج مايكل.

وكشفت حورية: بعرف اطبخ بس مش بأكل اللي بطبخه،  وبابا كل ما يشوفني يقولي انتي رفيعة وعايزة تتخني شوية.

حورية فرغلي: لما كنت ملكة جمال كنت بركز في شكلي دلوقتي بقول الحمدلله 

وفي اللقاء ذاته قالت حورية فرغلي: عملت 27 عملية في 8 سنين وفاضلي عملية كمان بس محتاجة اريح شوية من العمليات عشان تعبت، وبقيت احسن كتير وبعرف اشم.

واستكملت: لما كنت ملكة جمال مصر كنت بفضل ابص على كل حتة في جسمي ووشي وعايزة كل حاجه فيا حلوة .

وتحدثت حورية فرغلي عن أصدقائها من الوسط الفني، موضحة أن هناك العديد من الفنانين على تواصل دائم معاها وأوضحت: لطيفة ونبيلة عبيد ومادلين طبر وسوسن بدر وإلهام شاهين واللي كلموني مش هقدر انساهم كفاية أنهم سألوا عليا ووقفوا جنبي.

وكشفت حورية: الناس في الأول افتكرت عملت عملية تجميل ومش عارفة أزاي أنا كنت واخدة ملكة جمال مصر لكن هي حادثة فروسية.