" بتمنع نفسها عنى " أحمد يستغيث: مراتى خلعتنى عشان طلبت منها حقوقى الزوجية

“مراتى بتحرمنى من العلاقة الزوجية وحاسس إنى كنت متجوز راجل”.. بتلك الكلمات روى زوج فى بث مباشر لتحيا مصر يروى فيه مأساته مع زوجته التى قامت برفع عليه دعوى خلع بمحكمة الأسرة بسبب أنه طلب منها أن تسدد له إحتياجاته الجنسية وتعطى له حقوقه الزوجية .

عنيدة ومش بتدينى حقوقى 

بدأ الزوج حديثه لتحيا مصر :" أنا ومراتى قرايب واتجوزنا جواز تقليدى وعندنا 3 أولاد أكبرهم فى الثانوية العامة مراتى من يوم ما عيشت معاها وهى عنيدة وبترفض أى طلب بطلبه منها لدرجة أن حتى حقوقى الزوجية كانت بتمنع نفسها عنى فيها ولما كنت بحاول معاها وأقولها تلبس قمصان نوم زى بقية الستات ما بتعمل كانت بتقولى " أنت ملكش غير فى كدة وزهقت منك " مع إن ده شرع ربنا وحقى وأنا راجل بحب أكتفى ببيتى ومراتى ومش بحب أبص برة ولا اخونها لكن هى مكنتش مقدرة ده وكانت بتحسسنى أنها راجل مش ست ". 

كانت بتشتم إبنى بوالدى اللى لسة متوفى 

وتابع الزوج حديثه :" مراتى كانت طول الوقت بتشتم عيالى قدامى وبتشتمهم بوالدى اللى لسة متوفى وأنا بالرغم من كدة كنت محترم معاها وبسكت لحد ما فى مرة مقدرتش أمسك نفسى وضربتها على وشها لحد ما عنيها أزرقت وراحت صورت نفسها صور كتير عشان تبعتهم لأهلها وتطلعنى أنا اللى غلطان وبفترى عليها وتسيب البيت بالشهر والشهرين وتغضب عند أهلها اللى دايماً يسخنوها عليا وسعرفوا أسرارنا لحد ما خربولنا البيت " 

خلعتنى فى المحكمة ورمتلى هدومى فى الشارع 

واختتم الزوج حديثه :" مراتى بعد ما سابت لى البيت عرفت بالصدفة أنها رفعت عليا دعوى خلع فى المحكمة ورفعت كمان قضية تمكين وخدت شقتى اللى تعبت فيها ده غير النفقة اللى مش عارف أسددها أزاى بعد ما سيبت شغلى وقعدت فى البيت عند والدتى ووصل بيها كمان الجحود أنها رفعت عليا دعوى تبديد منقولات زوجية وهى أصلاً طردانى وواخدة الشقة بالعفش كله وكمان رمتلى هدومى فى الشارع وأخواتى هما اللى كانوا بيلموا الهدوم دى من على الأرض قدام الناس أنا حياتى أتدمرت وبيتى أتخرب ومش زعلان عليها أنا زعلان على عيالى اللى كانوا ناجحين ومتفوقين وهما عايشين معايا ودلوقتى مستواهم نزل وبقوا نفسهم يشوفونى ومش عارفين حسبى الله ونعم الوكيل فيها وفى أهلها على كل اللى عملوه فيا ".