مُسلم لتحيا مصر: التلحين بيدي روح للعمل وكلمات الأغنية أهم شئ بالنسبالي

كشف المطرب مُسبم عن تلحينه للأغاني التي يُقدمه، كما أوضح أنه دائمًا ما يحب أن يتعلم أشياء في صناعة الموسيقى في أوقات فراغه.

تحيا مصر يرصد لكم تصريحات مُسلم

وقال مسلم في تصريح خاص لموقع تحيا مصر: أنا بحب ألحان الأغاني لنفسي وبهتم بالتلحين، لكن التلحين بيأثر عليا خصوصًا في الأغاني.

مُسلم: طول الوقت بعمل حاجات ليها علاقة بالمزيكا

وتابع: أنا مش عندي أي حاجة اعملها غير الأغاني والتلحين وغير دول أنا بحب أعزف وبعمل كل حاجة تبع الموسيقى حتى في أوقات فراغي وطول الوقت بعمل حاجة ليها علاقة بالمزيكا.

مُسلم: التلحين بيدي روح للأغنية

وأضاف مسلم: بالنسبالي كلام الأغنية أهم حاجة بالنسبالي لأن ده شئ أنا بحسه من صناعة الاغنية وأول  حاجة بتكتب الأغنية وبعدين التلحين بيديله روح وبعد كده المغني بيحط احساسه عليه.

كما تحدث مسلم عن نجاح أغنية قلب في الدفاتر والتي طرحها مؤخرًا وقال: في أغاني لما بقت تجيب 20 مليون الناس بتقول عليها منجحتش، وفي أغاني بتنجح حتى لو جابت 10 مليون أو 5 مليون، وأغنية قلب في الدفاتر بقالها شهر بس وتخطت الـ 20 مليون مشاهدة على اليوتيوب وسعيد جدًا بنجاحها.

تصريحات مُسلم

كما أعرب مسلم عن سعادته بتكريمه في مهرجان الأفضل بين الأفضل وقال: مبسوط جدًا بوجودي في مهرجان الأفضل بين الأفضل ويارب دايمًا أكون عند حسن ظنكم ويارب يديم علينا الفرحة والنجاح ودي تاني سنة أكون موجود في المهرجان.

وعن تصنيف أغانيه في الطابع الحزين فقط قال مسلم: مش مصنف كحزين بس لكن بيصادف أن الأغاني بتكون  كلها نفس الطابع، و في حاجات كتير لسه منزلتش ومختلفه كليًا عن كل اللي نزل وهتنزل في الصيف الجاي أو العيد الصغير.

وعن اهتمامه بمشاهدات السوشيال ميديا قال مسلم: أنا مش بهتم بالمشاهدات على السوشيال ميديا والأهم بالنسبالي أن الإحساس في الأغنية يوصل للجمهور، و فرحتي بتكون في صناعة الأغنية نفسها مش في نجاحها من عدمه واللي أنا بحسه بكتبه وبلحنه لنفسي ومهم جدًا بالنسبالي إني أكون منصف لنفسي وأقدر أعبر عن اللي أنا حاسس بيه ولما بقدر أطلع ده والأغنية طلعت يبقى ده النجاح بالنسبالي.