" كنت بشوفه عفريت ".. زوجة للقاضى : أهل جوزى عملولى سحرعشان ننفصل وبيتنا يتخرب

“ كنت كل يوم بشوف تعابين على سريري ولما جوزى كان بيقرب منى كنت بشوفه عفريت ”.. بتلك الكلمات روت زوجة فى بث مباشر لتحيا مصر عن عائلة زوجها الذين قاموا بعمل سحر لها بسبب الغيرة مما تسبب فى تغيير حياة الزوجة بالكامل لتعيش فى مأساة مع زوجها تنتهى بالأنفصال .

تحيا مصر

كانت حياتنا كويسة وأهله كانوا غيرانين 

بدأت الزوجة حديثها لتحيا مصر :" أنا عندى 3 بنات وأنفصلت عن جوزى من فترة قريبة حياتى مع جوزى فى البداية كانت كويسة ومستقرة كنت بسددله كل أحتياجاته وكنت مهتمة بيه على أكمل وجه لكن أهله كانوا غيرانين وكانوا طول الوقت بيقولولى " أنتى مهتمة بيه عشان لسة جديدة في الجواز لكن لما تخلفوا هتبقى زوجة مهملة " لكن ده محصلش وبعد ما خلفنا الـ3 بنات فضلت زى ما أنا زوجة مثالية في نظر جوزى وفي نظر الناس كلها ".

عملولى سحر خلانى أشوف عفاريت وتعابين 

وتابعت الزوجة :" فى الفترة الأخيرة من جوازى حياتنا أتغيرت وبقينا أنا وهو كراهين بعض وأنا بالأخص كان بيجيلى أعراض غريبة كنت طول الوقت بحلم بتعابين واحس الحلم حقيقة كنت بشوفهم على سريري وبيبقي شكلهم شكل البنى آدمين لدرجة أنى كنت بخاف منهم حتى وأنا صاحية وجوزى لما كان يقرب منى كنت بشوفه عفريت مش بنى آدم لدرجة أنى عشان أحوش نفسى عنه وميقربش منى مسكت بنتى الصغيرة وهددته أنى هرميها من البلكونة لو مبعدش عنى وهو كمان أوقات كتير كان بيتحول ويبقى كارهنى لدرجة أنه رفع عليا السكينة وكان هيموتنى ولما لقيت شكلى بدأ يتغير وخسيت بقيت شبه الهيكل العظمى روحت مع والدى ووالدتى عند شيخ عشان يقولى أنا عندى أية ؟ وبالفعل قالى أنى معمولى سحر لكن مش من حد غريب من حد قريب منى وبيشربهونى كل يوم لكن الشيخ ده كان راجل طيب وعالجنى بالقرآن من غير أي فلوس لحد ما خفيت وبقيت كويسة لكن جوزى هو اللى فضل زى ما هو ".

جاب لى واحدة الشقة ولما شوفتها ضربتها بالشبشب

وأختتمت الزوجة حديثها :" السبب فى طلاقى من جوزى هو خيانته ليا اللى عرفتها من جيرانى لما لقيته بيطلب منى اروح عند والدتى ومرجعش غير بإذن منه وفى الوقت ده لقيت جارتى بتتصل بيا وبتقولى في واحدة مع جوزك عندك في الشقة ولما رجعت البيت عشان اتأكد من كلام جارتى لقيت فعلاً واحدة مع جوزى وعلى سريرى روحت نزلت فيها ضرب بالشبشب وهى كانت بتقولى "أنا جاية لجوزك عشان شغل ومتفهميناش غلط " لكن هو كان ساكت ومش قادر ينطق طلبت منه بعدها الطلاق وطلقنى فعلاً وسابنى أنا وبناتى من غير مصاريف لجأت لمحكمة الأسرة عشان ارفع عليه دعوى نفقة ومش مسامحاه هو ولا أهله لآخر يوم في عمرى "