مديحة حمدي: الست زمان كانت بتكنس بيت حماتها وزوجات ولادي بيختارولي لبسي

كشفت الفنانة مديحة حمدي عن عادات عائلتها في الزواج، كما كشفت عن علاقاتها بزوجات ابنائها، موضحة أنهم يختاروا لها إطلالتها.

تحيا مصر يرصد لكم تصريحات مديحة حمدي

وقالت مديحة حمدي، في برنامج ساعة زمن الذي يعرض عبر قناة صدى البلد، التي تقدمه الإعلامية مايا الشربيني: لو عندي عزومة في البيت أنا مرتبكش عشان مرات ابني موجودة، وهي عارفة كل حاجة في البيت وعارفة هتعمل إيه.

مديحة حمدي: عرفت اكسب زوجات ولادي

وتابعت مديحة حمدي: عرفت أكسبهم زوجات ولادي ومفيش حاجة بيعملوها ممكن تخليني مش حلوة معاهم، وهم متربيين كويس أوي.

وأضافت: فيه تقاليد في عيلتنا في الجواز إن أم العروسة تروح ترص حاجات بنتها في شقتها، وأم البنت عليها تملأ التلاجة، وأنا كنت بعيط، ودموع الفرح نزلت مني يوم جوازهم، ومنكرش إني بكيت وأم العروسة بكت برضو، لأن الفرحة بتهزك.

واستكملت: بنات ولادي مبيشتكوش أبدا من أي حاجة، ودول عسل أوي، وبقولهم انتوا كل ما يمر الوقت بتحلووا أكتر، لأن طباعهم فيها نضج وجربوا يعني إيه أمومة، والحياة ممارسة وتثقل المشاعر وتديها خبرات أكتر.

واسطردت: الحماة زمان غير، ففي البيئات البسيطة كانت زوجة الابن لا تجرؤ إنها تعمل بيتها أو تطبخ قبل ما تخلص شغل البيت عن حماتها سواء كنس أو مسح أو أي حاجة تتخيليها، وأصبح حق مكتسب.. فيه اللي بيتعايش مع الموضوع ده ويتقبله، وفيه واحدة تانية طبيعتها مش كده.

وتابعت: زوجي كان مناسب ليا ولأولادي، وهو من طنطا، كان رايح هو وأخوه يعزموا أهل البلد، ويشاء الله إنه يعمل حادث وعشان كان بيلعب تجديف فكان بنيانه قوي، والله يرحمه الضلوع اتأثرت بعد الحادث.

مديحة حمدي: حماتي كانت رفضاني في الأول

وأضافت: حماتي كانت رافضة زواجنا في الأول ولكن بعد ما شافتني واقفة مع ابنها بعد الحادث تغيرت فكرتها عني وقالتلي لو هدور على واحدة تنفع لابني مش هلاقي أحسن منك، وكنت موضع سرها بعد ما عاشرتني في الحياة، وكنت بقولها يا ماما.

مديحة حمدي: وزجات ولادي اللي بيشترولي لبسي

واختتمت: اللي بيشتريلي حاجاتي سواء لبس أو إكسسوات هم زوجات أبنائي، وعلاقتي بيهم جيدة جدا، وأنا عرفت أكسبهم عشان عايزة أبنائي سعداء، وولادي اتجوزوا بدري لأننا كنا مرتبين السكن بتاعهم وكانوا متجهزين للزواج، وكان رغبة من والدهم، وأكبر حفيد عندي عنده 20 سنة.