قاعد لوحده ومهموم.. صديق عاطف سعيد يكشف التفاصيل الأخيرة في حياته

خرج أحد أصدقاء الفنان الراحل عاطف سعيد، ليكشف عن معاناته من الإكتئاب والفقر قبل وفاته راويا موقف مؤثر دار بينهم في أخر لقاء، وذلك بعد أن وافته المنية في صباح اليوم الخميس.

تحيا مصر يرصد في ذلك التقرير أخر لحظات في حياة الراحل عاطف سعيد

عمر غانم عن عاطف سعيد: كان مهموم دايما وبيتكلم عن حبه للفن

وكتب الفنان عمر غانم عبر حسابه الرسمي بموقع التواصل الإجتماعي “فيسبوك”: سامحوني على الكلام الي هقوله ده لكن انا حزنت حزن شديد لم عرفت الخبر كنت كل ما اعدي من جنب قهوة صدفة الي جنب المعهد كنت الاقي عم عاطف قاعد لواحده مهموم كان اول ما يشوفني يقول لي تعالى اقعد اشرب معايا شاي اقعد معاه يقعد يشتكي ليا من قلة الشغل ويحكي ليا قد ايه هو بيحب الفن ومش عارف يعمل حاجه غيره رغم ظروفه الصحية والمادية الصعبة ويقعد يحكي ليا عن مواقف و وعود كاذبه بياخدها من نجوم كبار.

عمر غانم: قالي إنه ممكن بطلب شغل من على النت بس كرامته متسمحش بده

وتابع: كان عايز ينزل تصوير بأي شكل وكانت اخر مرة شوفته كانت من حوالي أسبوعين كنت في تصوير ولقيته هو وابنه الي ربنا يتولاه من بعده في اللوكيشن بالصدفة ف بسأله بتعمل ايه هنا يا عم عاطف رد وقال لي جي اسعى واقابل المخرج والنجم فلان علشان كان قايل لي انك معايا في المسلسل اللي جاي و قال لي يا عمر انا ممكن اعمل زي ناس كتير وانزل بوست واطلب شغل واعمل زي كل الي بيعملوا كده النهارده لكن كرامتي متسمحش لي اعمل كده .

واستكمل حديثه، قائلا: واللي مزعلني بجد انه كان مكلمني من اسبوع كده وطلب مني اني اروح معاه لشركة لم عرف ان صاحب الشركة صديقي وانا وعدته اول ما ارجع القاهرة هكلمه ونروح سوى وسبحان الله كان في بالي امبارح ان اكلمه واقول له اني راجع خلال يومين لكن ربنا افتكره.

عمر غانم ينعي عاطف سعيد بكلمات مؤثرة: كان راجل محترم ومكافح

وأشاد عمر غانم بـ بالراحل عاطف سعيد، فقال: عم عاطف كان راجل محترم ومكافح وعنده عزة نفس عم عاطف كان فنان جميل وقدر يعلم معانا بمشاهد بسيطه لكن اثبت وجوده بيها وطول ما انا معاه كانت الناس لم تشوفه تجري تتصور معاه وكان يبقى فرحان اوي وسامحوني على كلمة عم لكن انا كنت متعود اقولها له.. الاستاذ عاطف مات بحسرته لكن راح لربنا العدل وكان في كلام كتير لكن للأسف مش كل الي اتقال يتحكي  ربنا يرحمه ويغفر له ويسكنه فسيح جناته ويلهم أهله وذويه الصبر والسلوان.