«علشان تشترى غسالة».. زوج للقاضي: مراتي بتطلب فلوس من رجالة غريبة على الفيس بوك

مراتى بتشحت من الناس الغريبة ومفهماهم أنها بتصرف عليا ... بتلك الكلمات روى زوج لتحيا مصر من داخل محكمة الأسرة عن زوجته التى تخدع الرجال على الفيس بوك لكى تجنى منهم المال لشراء جهاز منزلى لم يقدر زوجها على شراؤه بسبب ضيق الأحوال المادية معاه .

سيبت شغلى وكنت فاكر مراتى هتقف جنبى 

بدأ الزوج حديثه لتحيا مصر :" أنا ومراتى متجوزين من 10 سنين وعندنا طفل وفي آخر سنتين أضطريت اسيب شغلى بسبب خناقة حصلت مع صاحب المحل اللى بشتغل فيه ومن وقتها والظروف المادية معانا بقيت صعبة وعلى القد ومراتى بدل ما تقف جنبى وتقوينى بدأت تتذمر على العيشة وبتشتكينى للناس طول الوقت مع أنى لما كان معايا مكنتش حارمها من حاجة هى وإبنى لكن نسيتلى كل ده في لحظة واحدة ".

جابت غسالة جديدة بفلوسها وشكيت فيها 

وتابع الزوج حديثه منفعلاً :" مراتى في وقت الأزمة اللى مرينا بيها كان بيجيلى عروض شغل كتيرة بمرتبات قليلة ولما كانت مراتى بتعرف كانت بتقولى " ده مرتب ميكفيش نفر واحد الأيام دى أستنى لحد ما تجيلك شغلانة بفلوس كتيرة " وأنا بالفعل سمعت كلامها ودورت على حاجة أحسن وفي الوقت ده كان أهلى وأهل مراتى هما اللى بيأكلونا ويصرفوا علينا لحد ما جينا مرة ولقينا الغسالة باظت ومراتى فضلت فترة منهارة بسببها لأنها غالية ومش هنعرف نجيب زيها تانى وكانت بتتعب من الغسيل على أيديها وطلبت من كل قرايبنا فلوس سلف عشان نجيب غيرها لكن محدش وافق وقالولها " هنجيب منين كل ده ؟" وبعد أقل من شهر لقيتها داخلة عليا البيت بغسالة جديدة وبتقولى صاحبتها جابتهالها هدية لكن مصدقتهاش والشك دخل قلبى ناحيتها ". 

كلمت رجالة على الفيس بوك عشان تاخد منهم فلوس 

واختتم الزوج حديثه :" الشك دخل قلبى لكن مقدرتش أثبت أن مراتى بتعمل حاجة من ورايا وهى اللى جابتلها الفلوس لحد ما فى مرة يشاء القدر وتنسى تليفونها مفتوح لما قامت  تجرى على عياط أبننا وأنا أستغليت اللحظة دى وفتحت تليفونها وشوفت عليه اللى كسر قلبى وخلانى أطلقها في ثوانى لقيتها بتكلم رجالة على الفيس بوك من صفحة وهمية وبتشحت منهم فلوس وبتقولهم أنها متجوزة راجل شرانى مخليها تصرف عليه وعلى البيت كله وكل ده كدب وبالتالى صعبت عليهم وأدوها حوالى 30 ألف جنية جمعتهم من أكتر من 20 راجل وشوفت محادثاتهم كلهم  وبالفلوس دى أشترت الغسالة ولما شافتنى ماسك التليفون أرتبكت وبان الرعب على وشها رميت عليها الطلاق فى لحظة وهى دلوقتى رافعة عليا نفقة في المحكمة ربنا ينتقم منها حرمتنى من أبنى لكن هتفضل لآخر لحظة في عمرى ست مادية بتضحك على الناس عشان خاطر الفلوس ومش بعيد كمان كانت تسلم نفسها وجسمها عشان توصل للى هي عايزاه ".