«بيهددونى بنشر صوري».. زوجة للقاضي: جوزي وطليقي اتفقوا عليا ودمروني باسم الحب

متحاوطة بأتنين رجالة دمرولى حياتى وخلوها جحيم ... بتلك الكلمات روت زوجة لتحيا مصر من داخل محكمة الأسرة عن أزواجها الأثنان اللذان يطاردونها ويهددونها بنشر صورها الخاصة على مواقع التواصل الأجتماعى إذا لم تتنازل عن القضايا التى رفعتها عليهم بمحكمة الأسرة .

اتطلقت من جوزى الأولانى بسبب وضعه المادى 

بدأت الزوجة حديثها لتحيا مصر :" اتجوزت من أول زوج ليا وأنا عندى 20 سنة كنت بحبه وهو كان روحه فيا وبيتمنالى الرضا أرضى خلفت منه بنت وولد وعيشت معاه 7 سنين لكن في الآخر أتطلقنا بسبب المصاريف وأنى مكنتش عارفة أعيش معاه أنا وعيالى هو شغال فى ورشة نجارة و الوضع المادى معاه بسيط جدأ وأنا عايزة أعيش عيشة كويسة ومكنتش قابلة بالوضع هو مكنش عايز يسيبنى ومش راضى يطلق بس أنا فضلت وراه وطلبت من أهلى وأهله يتدخلوا وهما اللى قالوله " خلاص سيبها لحالها طالما مش مرتاحة ومش عارف تعيش " وبعد الطلاق كان بيجيلى الشقة كتير بحجة أنه جاى يزور ولاده لكن هو كان بييجى عشان يحاول يقنعنى ارجعله تانى وأنا كنت خلاص نهيت الموضوع وملهوش رجوع تانى ".

اتجوزت تانى عشان أعرف أكمل حياتى 

وتابعت الزوجة :" بعد سنة واحدة من طلاقى قررت أنى موقفش حياتى على الطلاق واتجوز تانى وخصوصاً أن كان متقدملى راجل كويس ومحترم وعنده عربية ملاكى شغال عليها سواق هو معايا من نفس المنطقة وعارف قصتى وأنا كنت معجبة بيه عشان حسيت أنه شارينى وأن وضعه المادى كويس وبالفعل كتبنا الكتاب واتجوزنا وعيشت معاه فى شقته لكن جوزى رفع عليا قضية بعد جوازى وخلاهم يعيشوا مع والدتى وكنت كل يوم بزورهم وبيزورونى ".

طليقى بعت لجوزى صورى من غير هدوم  وأتفقوا عليا 

واستكملت الزوجة :" فرحتى مكملتش وجوزاى الجديد ملحقتش أتهنى بيه بسبب طليقى اللى حاول بكل الطرق أنه يخرب عليا حياتى لما عرف أنى بقيت مع راجل تانى طليقى جاب رقم جوزى وبعتله صور ليا من غير هدوم وقاله " مراتك لسة بتكلمنى وبتبعتلى صورها وعايزانى أجيلها الشقة وأنت مش موجود " وقاله كمان أنى ست بتلعب بالرجالة و بتتجوزلها راجل شوية وتاخد منه كل اللى حيلته وبعدين تروح تشوف غيره وبالتالى قدر يكسب جوزى فى صفه وبقوا بيتقابلوا وبيتفقوا عليا أزاى ينتقموا منى وكل ده محصلش لأنى ست محترمة وبخاف ربنا لكن جوزى  صدق عليا كل كلمة وبقى كل يوم بينزل فيا ضرب من غير رحمة ".

دمرونى بإسم الحب 

واختتمت الزوجة حديثها باكية :" الأتنين دمرولى حياتى بإسم الحب طليقى فضحنى عند جوزى عشان الغيرة اللى فى قلبه وجوزى بيهددنى بنشر الصور دى على المواقع لو طلبت منه الطلاق أو رفعت عليه أى قضايا في المحكمة هو عايزنى أفضل عايشة تحت رحمته بس وأنفذله كل اللي يطلبه منى كنوع من أنواع العقاب والأنتقام وبيقولى " أنا بالرغم من كل اللى عرفته عنك لسة بحبك ومش هطلقك بس هعيشك معايا تتعلمى الأدب "  وكلامه ده خلانى هربت من البيت عشان أعيش مع واحدة صاحبتى وخدت معايا عيالى وجوزى رفع عليا قضية نشوز عشان يرجعنى البيت لكن أنا حولتها لقضية طلاق للضرر ومستمرة في دعوى النفقة لولادى من طليقى ومش هسيب حقى منهم لأنى لو حسستهم بضعفى هيأذونى أكتر  ".