زوجة لقاضي الأسرة : جوزى حرمنى من أبنى وبيقولى أنتى جايباه من راجل تانى

جوزى شكاك والمخدرات اللى بيشربها هى اللي خربت لنا البيت ... بتلك الكلمات روت زوجة لتحيا مصر من داخل محكمة الأسرة عن زوجها متعاطى المخدرات والذى حرمها من طفلها بسبب شكه في سلوكها وأنها تقيم علاقات غير شرعية مع رجال آخرين وبالتالى شك فى أن يكون أبنه من صلب رجل آخر .

تحيا مصر 

جوزى راجل مش طبيعي 

بدأت الزوجة حديثها لتحيا مصر :" أنا وجوزى اتجوزنا من 9 سنين وخلفنا طفل عنده 8 سنين جوزى كان بشرب مخدرات قبل الجواز بس كان بيقولى أنه بيشربها في المناسبات بس وأنها مش حاجة أساسية في يومه ولا متعود عليها لكن بعد الجواز أكتشفت أنه بيضحك عليا لما لقيته يومياً بيشرب صبح وليل واليوم اللي ميشربش فيه بيبقى أنسان مش طبيعي وعامل زي الشيطان وطبعاً فلوسنا كلها خلصانة على الحشيش والبودرة ولما سألته هو لية مقاليش أيام الخطوبة أن الوضع والعيشة هتبقى كدة بعد الجواز قالى " أنا مكنتش كدة بس مصاريف ومسئولية الجواز هما اللي خلونى محتاج حاجة تطلعنى من المود الوحش والهم بتاع اليوم ".

بيشك فيا طول الوقت وبيتهمنى بالخيانة 

وتابعت الزوجة :" جوزى لما السنين مرت والمخدرات بدأت تاكل دماغه بقى بيشك في الناس كلها اللي حواليه بيشك في صحابه وفي أهله حتى صديق عمره شك فيه أنه نصب عليه في فلوس وكان هيقتله وخسروا بعض بسبب كدة حتى أنا اللي أسمى مراته وشرفى من شرفه طول الوقت لو أهتميت شوية بنفسي وبشكلى ونزلت الشارع أزور أهلي أو أشترى شوية طلبات للبيت يفتركنى رايحة أقابل رجالة وبيقولى " أنتى بتروحى لرجالة في بيتها وبتعملى معاهم حاجات مش كويسة وبيدوكى فلوس " ده غير أنه لما بتحصل بيننا العلاقة الزوجية اللي بتحصل بين أي راجل ومراته بلاقيه في لحظتها بيبص على جسمى وبيدور لو فى أى علامات تدل أن حد تانى لمسنى كل ده أنا كنت بستحمله عشان خاطر أبنى لحد ما حرمنى منه هو كمان وحسر قلبى عليه ". 

خطف أبنى وبيقولى مش هرجعه غير لما أعرف هو إبن مين ؟

واختتمت الزوجة حديثها :" جوزى كان لما لقانى بدأت أهمله ومش عايزاه يلمسنى ولقانى بتأخرعند والدتى كتير ومش عايزة أرجع البيت بدأ يشك أن أبنى يطلع من راجل تانى ومش منه هو أنا كنت بتهرب منه عشان تعبانة من العيشة معاه لكن أنا ست شريفة وعمرى ما سمحت لراجل يلمسنى غير جوزى أما هو وصل بيه الجبروت أنه يبعت 3 رجالة ياخدوا مني أبنى بالعافية في حوش البيت عندنا لما كنت برجعه من المدرسة وفضلت أصرخ وأتحايل عليهم يسيبوه ومرضيوش ولما كلمته أستنجد بيه وفاكرة أنه هيجرى يدور علي أبنه طلع أن هو اللى ورا القصة دى وقالى " مش هرجعهولك ولا هتشوفيه تانى غير لما أعمله تحاليل وتعترفى هو يبقي أبن مين ؟" أتصدمت من كلام جوزى ورفعت عليه دعوى طلاق للضرر عشان أخد حقى في حضانة الأطفال وساعتها أخد أبنى منه بالقانون ده راجل مريض ومدمن واللى زيه لازم يتحبس ودى كانت غلطتى أنا أنى سمحتله يبقي زوج ليا وأب لأبنى ".