دعاء فاروق لـ صناع "أزمة منتصف العمر": خدوا أنتم النجاح وسيبونا مع النكد اللي اتسببتوا فيه

حرصت المذيعة دعاء فاروق على إبداء رأيها في مسلسل “أزمة منتصف العمر”، الذي يعرض حاليًا على منصة شاهد الإلكترونية، معربة عن استيائها من الأحداث والشخصيات، وذلك من خلال منشور لها عبر حسابها الشخصي على موقع التواصل الاجتماعي “فيسبوك”.

تحيا مصر يرصد تفاصيل أحدث منشورات دعاء فاروق عبر فيسبوك

حيث كتبت: “طيب يا جماعة حد مستني النهاية في سواد منتصف النيلة المستنقع اللي بنتابعه.. أنا بالنسبة لي وبالاصألة عن نفسي كده جاب الناهية خلاص.. فاضل تلات حلقات أو حتى عشرة دي كلها شكليات المسلسل خلص والستاير السودا نزلت، موتتوا بصيص الفرحة الوحيد و قتلتوا سرسوب أي أمل كنا مستنيينه يظهر”.

رسالة دعاء فاروق لـ كريم فهمي

وتابعت: “حد يفكرني كده.. هو كريم فهمي كان زعلان إن الناس متضايقة من الأحداث الكحلي اللي بتحصل وبيقول علينا لمؤاخدة لجان، ألا هو أنت يا كريم كنت عاوزنا نتابع المسلسل ونفرح ؟؟؟  هل كنت مستني الناس  تتبسط بالأحداث مثلا”.

واستكملت: “لا بص يا كريم غالبا حصل عندك لبس في الموضوع.. أنت المفروض تتبسط أننا بنتابع.. وتفرح أننا بنتفرج وكفى..  وده قمة النجاح اللي يلزم أبطال العمل إن المسلسل متشاف وشكرا”.

دعاء فاروق تشيد بتمثيل الفنانين في المسلسل

وبالرغم من هجوم “فاروق” على أحداث المسلسل، إلا أنها كانت حريصة على الإشادة بتمثيل الفنانين، حيث قالت: “تمثيلكم كلكم رائع وشكرا ... ومحدش قال أنكم مش بتمثلوا هايل كلكم بتلعبوا في الأهلي يا سيدي.. وبعد الحلقة الاتناشر اللي بليتونا بيها أنت وريهام ورنا رئيس ورشدى المهدي وعمر السعيد تقدروا تحترفوا في ليفربوول بجدارة”.

واضافت: “إنما مفهمتش هل أنت كنت عاوز الناس  تشكر في الأفعال غير المبررة اللي بتعملها الشخصيات الحزينة دى ؟؟؟ منين جبتوا الثقة دي مفهمتش حتى لو موجودة في الدنيا.. حد قالك إن أحنا بنسقف لهم؟؟!!! .. حد اتبسط مثلا لما البنت بتاعت بورسعيد قتلت أمها بالاشتراك مع صاحبها ؟!!! حد كان فرح لما الواد قتل نيرة أشرف ؟؟؟”.

دعاء فاروق تهاجم أحداث “أزمة منتصف العمر”

واستطردت: “كريم اتضايق جدا ان بعض الناس قالوا ان فيه زنا محارم وهم لسه مشافوش المسلسل لآخره ... طيب احنا أسفين يا كريم، طلع زنا بس..  المفروض الناس تسقف يعني للعلاقة غير السوية اللي بين فيروز وعمر ؟.. ماتسيبوا الناس ترفض يا أخي براحتها”.

وتابعت: “الحلقة الاتناشر اتنكدت بسببها وشايفة أنها نقلت المسلسل من منطقة الساسبنس لمنطقة سواد غميقة ضايقتنا جدا وقبضت قلبنا وانا هنام متنكدة النهاردة يا أساتذة بسببكم ... خدوا أنتو النجاح وسيبونا نعبر عن النكد والسواد اللي اتسببتوا فيه”.

واختتمت: "اتبسطوا بالترندات والبوستات والمقالات والفيديوهات حتي لو بتشتم في الأشخاص والأفعال لأنهم لازم يتشتموا كلهم ولا تحبوا بالمرة نسقف للبنت المدمنة ونزرغط لياسمين اللي ماشية تصطاد رجالة كبار".