ياسمين عز: بيحطوا رجل العروسة في جذمة العريس في المغرب عشان يبقى سمنة على عسل

كشفت الإعلامية ياسمين عز عن سر من أسرار ليلة الزفاف في دولة المغرب، كما هاجمت بعض البنات، وذلك في برنامجها كلام الناس الذي يعرض عبر قناة أم بي سي مصر.

تحيا مصر يرصد لكم تصريحات ياسمين عز

وقالت ياسمين عز: كنت قاعدة مع سيدة مغربية وقالتلي سر من أسرارهم عن ليلة الزفاف، وهما عندهم عادة قديمة بيعملوها عن جدتهم في الأفراح وهي أم العريس ليلة الزفاف بتدهن رجل العروسة عسل، وبتدهن جزمة العريس سمنة، وبيحطوا رجل العروسة في جذمة العريس عشان يبقى سمنة على عسل.

وتابعت: العروسة بتطلب دهب مش أقل من هايدي بنت عمها والعريس الغلبان بيخرج من عندهم شعره شايب ومطقطق من كتر الطلبات.

ياسمين عز للبنات: عيشي عيشة أهلك ومتتعمليش مع خطيبك أنه بيل جيتس

وهاجت ياسمين عز البنات وقالت:عيشي عيشة أهلك ومتتعمليش مع خطيبك أنه بيل جيتس وبيتك مفيهوش غير شاشة ٣٢ بوصة وتطلبي من خطيبك شاشة سمارت عشان تتفرجي على شاهد، وكمان تتفرجة على مسلسل أزمة منتصف العمر.

ياسمين عز للبنات: كفاية دلع ماسخ ومتطلبيش غسالة أطباق وتلاجة ميني بار

وأضافت: بتطلبي غسالة أطباق ومكسلة تغسلي الطبق اللي هياكل فيه فرعونك حبيبك، وبتقولي عايزة تلاجة ميني بار عشان خايفة تمشي على رجلك تجيبي ماية من المطبخ، هاتي كباية ماية جنبك وكفاية دلع ماسخ ملهوش لازمة.

تصريحات ياسمين عز عن قائمة المنقولات

وفي الحلقة ذاتها تحدثت ياسمين عز عن الخلافات التي تحدث بين العريس والعروسة بسبب قائمة المنقولات وقالت: العريس والعروسة بيتخنقوا على القايمة وبينسوا المودة والرحمة اللي بينهم  والعفش بيرجع للعروسة تاني متكسر بسبب العند،  اللي يأتمن على العرض لازم يخاف عليها اكتر ما يخاف من ورقة قايمة، وبتنسوا كل حاجة وتفتكروا شوية كراكيب وتنسوا الرحمة، والمفروض ولا قايمة اللي تزعلكوا من بعض ولو معاه مال الدنيا واخلاقه وحشه هتجري.

وأضافت ياسمين عز: انتي بتنسي انه صرف اللي وراه واللي قدامه عشان يتجوزك، ومش ورقة منقولات اللي هيضمنوا أنه كويس، اخلاقه وأصله اللي هيضمنوا أنه كويس.