«مريض وملهوش حد غيري».. زوجة للقاضي: جوزى ضربني لما عرف أن والدي هيعيش معانا وقالي مصاريفه كتير وهيزهقنا

أبويا ملهوش حد في الدنيا غيرى ولما جه يعيش معايا جوزى كسر بخاطره وطرده في الآخر ... بتلك الكلمات روت زوجة لتحيا مصر من داخل محكمة الأسرة عن زوجها الذى عامل والدها بقسوة أثناء عيشه معهم في بيتهم وذلك بسبب تكاليف علاجه باهظة الثمن الذي أصبح الزوج لا يتحملها حتى وصل به الأمر إلى طرد هذا الرجل المسن من بيته فجراً لتتألم الزوجة على والدها وترفع عليه دعوى طلاق للضرر . 

والدي ملهوش حد غيري بعد ما والدتى توفت 

بدأت الزوجة حديثها لـ تحيا مصر :" أنا وجوزي متجوزين من 11 سنة وعندنا 4 أطفال جوزي وضعه المادي بسيط  بس ربنا بيرزقنا والدنيا ماشية والدتي توفت من سنة وكسرت قلوبنا كلنا وأبويا للأسف مخلفش غيري وحتى أخواته محدش منهم بيسأل عليه حال أبويا ووحدته وجعتني وأتحايلت عليه كتير ييجي يعيش معانا لأنه كبير في السن وعنده الضغط والسكر والقلب ومبيعرفش يخدم نفسه ولا فلوسه بتكفي يشتري كل العلاج اللي هو محتاج لكن هو رفض وقالي " كفاية عليكي يا بنتي الأربع عيال ومصاريفهم، العيشة بقيت صعبة ومش عايز أجي أحملكم فوق طاقتكم " ولما لقيته مصمم بقيت بعمله أنا الأكل واوصلهوله مع حد من عيالى وأشتريله كمان الأدوية لما جوزى بيكون قادر على ده وفضلنا سنة على الحال ده لكن كنت بحس بالتقصير طول الوقت عشان سايباه لوحده بين أربع حيطان ومفيش حد يحكي معاه ولا يشوفه ". 

جوزى ضربني لما عرف أن أبويا هييجي يعيش معانا

وتابعت الزوجة :" في آخر شهرين الوضع مع والدي بقى صعب وبقى بيجيله حالات إكتئاب ويفضل بالأيام مش بيرد علينا في التليفون وبيهمل في صحته ومش بياكل ولا بياخد الأدوية روحت أنا مسكتش وروحتله في مرة لميت كل هدومه في شنطة وخدته معايا البيت غصب عنه ولما جوزى رجع من الشغل وشافه عندنا في البيت أفتكره جاي يزورنا شوية وهيمشي لكن لما شاف شنطة هدومه وسألني " أية ده ؟" وقولتله " أبويا هيعيش معانا في البيت أنا مش هتحمل أسيبه يعيش لوحده تانى ومش هستني لما يهمل في صحته ويروح مني زي ما أمي راحت " راح ضاربني بالقلم علي وشى وقالي "أطلعي بره رجعيه بيته زي ما جيبتيه من دماغك من غير ما تاخدي أذنى  " لكن أنا مسمعتش كلامه وهو لما لقانى مصممة هددنى أنه هيطلع هو اللي يطرده وأنا قولتله أن لو ده حصل مش هقعدله في البيت دقيقة واحدة أنا وعيالي وهروح أعيش مع أبويا راح سكت وفضلنا شهرين عايشين كلنا في بيت واحد ودا كان أصعب وقت في حياتي ". 

جوزي طرد أبويا في عز الفجر وقاله مصاريفك كترت وزهقت منك 

واختتمت الزوجة حديثها :" جوزي مكنش عارف يستحمل والدي شهرين على بعض وكان كل شوية يعايره باللقمة اللي بياكلها والقرش اللي بيدفعهوله في العلاج ووالدي كان بيسكت وبيكتم في نفسه عشان طيب وغلبان ومش بتاع مشاكل وأنا على قد ما بقدر كنت بحاول أهدي الدنيا بينهم لحد ما جينا فى مرة كنا سهرانين الساعة 4 الفجر ووالدى تعب فجأة وكان العلاج بتاعه خلصان فطلبت من جوزى ينزل يشتريه وللأسف العلاج ده كان تمنه غالي راح جوزي لما عرف تمنه قالي " أنا زهقت من مصاريف أبوكي هو أنا بتعب وبشقى في شغلى عشان الفلوس تخلص على علاجه وأكله وشربه أنا عيالي أولي بالفلوس دى " راح مسك أبويا من جلبيته وطرده بره الشقة ورماه على السلم وقاله " روح اصرف على نفسك من المعاش بتاعك أنت شكلك أستحليت العيشة معانا وهتقرفنا في عيشتنا " والدى فضل يبكي بقهرة على نفسه ورجع بيته وأنا خدت عيالي ولميت هدومى وروحت لأبويا أعيش معاه ورفعت على جوزى دعوى طلاق للضرر لأنه راجل مش أصيل وطول ما هو مش قادر يشيل أبويا الغلبان فوق راسه يبقي أنا كمان عمرى ما هعيش معاه لحظة تانية من النهاردة ".