عزة بهاء: اكتشفت أن جوزي اتجوز عليا بعد ما مات وقت دفنته

أكدت الفنانة عزة بهاء على أن السبب وراء عدم رغبتها في الزواج مرة أخرى هو تعرضها للخيانة والكذب، وذلك خلال حوارها اليوم ببرنامج “الستات”، مع الإعلامية سهير جودة.

تحيا مصر يرصد تفاصيل تصريحات عزة بهاء في برنامج الستات

حيث قالت عزة: “أنا حرمت من الجواز، عشان حابة أعيش مع نفسي وأدهم وبابا، ولو جالي شغل يرضيني أو يعجبني هنزل اشتغل.. واتقفلت من الجواز بسبب الخيانة والكذب الكتير، ومفيش حد أبيض”.

وتابعت: “حد من أزواجي اتجوز عليا من غير ما أعرف، واتوجعت أنه حصل من غير ما اعرف، لأن ليا حق أرفض أو أقبل، وكان دا في الجوازة التالتة، مات وملحقش يبرر ليا، واكتشفت جوازه عليا بعد ما مات، في الدفنة”.

سبب عدم تنوع أدور عزة بهاء

وفي الحلقة ذاتها، كشفت عزة بهاء عن السبب وراء عدم تنوع أدوارها، فقالت: “لما عندنا حد بينجح في شخصية معينة يبتدوا يجيبوه على طول في نفس الشخصية، فهو دا اللي حصل، يعني أول ما طلعت كنت البنوتة الرقيقة أو الهانم عجبتهم فضلوا يرشحوني فيها”.

وتابعت: “حاولت في الليل وأخره مع مدام رباب أخرج شوية عن إطار الأدوار اللي أنا متعودة أعملها، والدور طلع شكله حلو، بس بردو الهانم الشريرة، ومرة عملت كوميدي مع رائد لبيب الله يرحمه وكان مسلسل لطيف مقبول، لكن معرفتش أخرج أوي من الإطار اللي هما حطوني فيه”.

كواليس مشاركتها في مسرحية “الواد سيد الشغال”

وفي وقت سابق، تحدثت الفنانة عزة بهاء عن مشاركتها في مسرحية الواد سيد الشغال، وذلك خلال لقائها ببرنامج كلام الناس، مع الإعلامية ياسمين عز.

وقالت عزة بهاء: الإفيه كان مكتوب في الاسكريبت لكن إن عادل إمام يمسكني من مناخيري ويرقص بيا مكنش مكتوب، وأي حد جنب الزعيم عادل إمام بينور، والدور ده مكنش دوري كان لبنت بس حصلها ظروف.

وتابعت عزة بهاء: كنت في الكواليس بشوف استاذ عادل بيعدي بس الناس بتضحك، وكنت بقول انا هدخل اعمل ايه وبنسى الكلام، واستاذ عادل كان بيطمني لحد ماتعودت، ومرة دخلت قولتله همشي بدري عشان ماشية مع صحابي، قالي يا عزة التحية جزء من العمل وكان في أسس وتعليم.