"مراتي سحرتلى عشان أفضل تحت طوعها ومرفضلهاش طلب".. مأساة زوج

مراتي طلبت من جارتنا تعملى سحر عشان مقدرش ارفضلها طلب ولا أستغنى عنها.. بتلك الكلمات روى زوج لتحيا مصر من داخل محكمة الأسرة عن زوجته التى لجأت لأعمال السحر علي يد جارتها التي أشتهرت بتلك الأعمال في المنطقة وكان السبب وراء ذلك هو رغبتها فى أن يكون الزوج تحت طاعتها طوال الوقت في المنزل وأمام الجميع . 

مراتي مش بتحب يتقالها "لا" 

بدأ الزوج حديثه لتحيا مصر :" أنا ومراتي متجوزين من 8 سنين وعندنا 3 بنات مراتي شخصيتها قوية و بتحب تسيطر علي كل اللي حواليها سواء  أهلها او أصحابها وحتى معايا أنا من أول يوم جواز لينا كانت لما تطلب مني اي حاجة ومقدرش أعملها كانت تسيبلي البيت وتمشي او تتكلم عليا وحش مع أهلي وأهلها او تهمل في أهتمامها بيا و بالبيت عشان تسببلي نوع من أنواع الضغط وأعملها اللي هي عايزاه في الآخر وكان ممكن كمان أوقات كتير تسخن بنتي الكبيرة عليا وأكنها بتعلمني أني مرفضلهاش طلب بعد كدة ". 

جارتنا بتعمل للناس أعمال ومراتي بتحبها 

وتابع الزوج حديثه :" أنا ومراتي عايشين في عمارة وفي العمارة دي لينا واحدة جارتنا ست كبيرة ومعروفة في المنطقة أنها بتعمل سحر وأعمال للناس بمقابل مادى ومراتي بتحب الست دي و بتقولي " دي كبيرة في السن وطيبة " لكن بنسبالي أنا كنت بخاف علي بيتي ن الست دي لانها خربت بيوت كتير ومراتي أوقات كتير بتكون ساذجة وممكن تصدقها وتمشى وراها وخصوصاً أن الست دي نفسها كانت مش سايبالنا في حالنا لأنها عارفة أننا مرتاحين مادياً فكانت بتبقي عايزة تعملنا اي مصلحة وتطلع من ورانا بقرشين ". 

مراتي سحرتلي أني أفضل تحت طوعها 

واستكمل الزوج حديثه :" أستحملت طبع مراتى الصعب لمدة 8 سنين وكنت باخدها علي قد عقلها وبعملها اللي هي عايزاه لأنها في الأول وفي الآخر أم عيالي لكن الفترة الأخيرة بدأت أعارض أسلوبها وطريقتها وأرفضلها طلبات كتير لأني بدأت احس أنها بتستغلني ومستقوية عليا وده خلاها تلجأ للحيلة اللي أنا كنت خايف منها من يوم ما اتجوزتها وهي أنها راحت لجارتنا ودفعتلها فلوس قد كدة كانت واخداهم مني علي أساس أنهم مصاريف المدرسة للبنات وطلبت منها تعملها سحر يخليني أفضل بطاوعها وعامل زي الخاتم في صوباعها ومقدرش أستغني عنها مهما حصل وبالفعل جارتنا أديتلها بودرة تحطهالي في الأكل كل يوم والبودرة دي هتخليني واحد تاني ". 

طفل صغير هو اللي كشفلى حقيقة مراتي 

واختتم الزوج :"  وكل ده أنا عرفته من الولد الصغير اللي بيشتغل مع الست دي لأنه بيحبني وأنا متعود أديله فلوس دايماً وأكل كنوع من أنواع العطف بعد ما أهله رموه وسابوه للست دي وهو اللي جه حكالي كل الحوار اللي دار بين مراتي وبين جراتنا وده من نعمة ربنا عليا أنه ينورلى بصيرتي واجهت مراتي بعملتها وعرفتها أني عرفت ولما مقدرتش ترد عليا وأرتبكت في الكلام وخافت رميت عليها يمين الطلاق وهي دلوقتي رافعة عليا في المحكمة دعوى نفقة عشان اللي مقدرتش تطوله مني في الجواز تطوله مني بعد الطلاق أنا كنت متجوز واحدة عايزة خدام تحت رجليها مش زوج يرعاها ويربى عيالها ".