عنيدة ودماغها ناشفة.. زوج للقاضى: مراتى بتنيمني على الأرض في كل خناقة بيننا ومبترضاش تأكلني

كل مرة نتخانق أنا ومراتي الاقيها جابت أهلها يباتوا معانا ومعرفش اقعد في بيتي بسببهم ... بتلك الكلمات روى زوج لتحيا مصر من داخل محكمة الأسرة عن زوجته ذو الطبع العنيد والتي تعامله معاملة قاسية دائماً أثناء نشوب الخلافات بينهم مما يشعر الزوج بالإهانة وعدم الأرتياح في منزله حتي قرر رفع علي زوجته قضية إنذار لبيت الطاعة في محكمة الأسرة حين تركت له المنزل وأخذت أطفالها معها . 

مراتي عنيدة وشخصيتها أنتقامية 

بدأ الزوج حديثه لتحيا مصر :" أنا ومراتي متجوزين من 5 سنين وعندنا ولدين أحنا لسة شباب عشان اتجوزنا أنا وهي وعمرنا لسة متخطاش الـ23 سنة واتجوزنا عن قصة حب كبيرة لكن عيبها أنها من يوم ما عرفتها وهي شخصيتها عنيدة مع كل اللي حواليها سواء أهلها او صحابها وده خسرها ناس كتير لأنها دايماً لو حد زعلها بقصد منه او بدون قصد تعند معاه وتنتقم منه في حاجة هو محتاجها عشان تضايقه زي ما ضايقها لحد ما يرجع ويعتذرلها ". 

كل ما نتخانق تجيب أهلها يقعدوا في بيتي ويناموا على سريرى

وتابع الزوج حديثه :" أنا ومراتي بالرغم من حياتنا المستقرة مع بعض لكن في كل خناقة بتحصل بيننا زي اي اتنين متجوزين بلاقيها بتتحول لشخص عنيد وتعمل أكتر حاجة بكرهها في حياتي وهي أني احس بزحمة في بيتي وده دايماً بيحصل لما بتجيب أهلها يباتوا معانا لأني بضطر وقتها انام علي الأرض عشان والدتها كبيرة في السن ولاز تنام جنبها علي السرير أما والدها متوفي ده غير أخواتها وبنات خالاتها اللي بيحتلوا البيت كله في بداية الجواز كنت بسكت علي الموضوع ده لأنه بيحصل مرة علي مدار فترات كبيرة وكنت بعرفها أنه بيزعجني وعشان كدة هي في آخر سنة جواز لينا بقيت بتلجأ للأسلوب ده في كل مرة نتخانق عشان تضايقني رغم أن خناقاتنا بتبقي علي اسباب تافهة جداً زي مصاريف الولاد وطلباتهم الكتير ". 

بتقولي جيب أكل من برة عشان أهلي ياكلوا براحتهم 

واستكمل الزوج حديثه منفعلاً والغضب يملأ وجهه :" مراتي مش بس بتنيمني في الأرض طول ما أهلها موجودين دي كمان بتطبخلهم هما بس وتخليني أنا اجيب أكل من برة عشان أهلها ياكلوا براحتهم في أول كام يوم لما قالتلي كدة صبرت نفسي وسمعت كلامها وقولت هانت يومين وهيمشوا لكن في آخر خناقة بيننا الموضوع طول وأهلها فضلوا قاعدين في بيتي بالـ15 يوم  لحد ما جسمي تعبني من نومة الأرض وفلوسي خلصت علي أكل المطاعم فأضطريت في مرة أحرجهم بالذوق وفعلاً أتكسفوا كلهم ومشيوا وهي وقتها عندت معايا أكتر وقالتلي " زي ما مشيت أهلي من البيت مضايقين  شوف بقي مين اللي هتقعدلك فيه " وبالفعل خدت عيالي وراحت قعدت مع والدتها ومشوفتهاش ولا شوفت ولادي لحد دلوقتي بقالي 3 شهور ".