"جوزي حاول يحرق بنتي من طليقي الأولاني بسبب الغيرة ".. مأساة زوجة

اتطلقت من جوزي الأولاني واتجوزت بعدها واحد غيرته صعبة ومرضية ... بتلك الكلمات روت زوجة لتحيا مصر من داخل محكمة الأسرة عن زوجها ذو الطبع الغيور و العنيف الذى خدعها بإنه سيعامل إبنتها من زوجها الأول بالحسنى ولكن مع مرور الوقت لم يحتمل تواجدها وإهتمام زوجته بها فحاول التخلص من الطفلة بأبشع الأساليب . 

طلاق وجواز 

بدأت الزوجة حديثها لتحيا مصر :" كنت متجوزة راجل وعيشت معاه 7 سنين وعندي منه بنت بس اتطلقنا بعد ما اكتشفت خيانته ليا واتجوزت بعدها بسنة راجل تاني وكان زميلي في الشغل لأني شغالة موظفة في مدرسة كنت رافضة فكرة الجواز مرة تانية بس حسيت أني لسة في بداية حياتي وأن عمرى لسة متجاوزش الـ30 وكمان عشان بنتي اللي عمرها 6 سنين ومحتاجة حد يكون جنبي في تربيتها ".

جوزي عنده غيرة مرضية

وتابعت الحديث :" بعد ما اتجوزت زميلي في الشغل وكان باين عليه طول فترة معرفتي بيه أنه هادي ومحترم ومش بتاع مشاكل وخصوصاً أنه لما طلبني للجواز وعدني أنه هيحط بنتي في عنيه  حبينا بعض أنا وهو  لأبعد حد بعد ما بقينا في بيت واحد وحسيت أن هو عوضي في الدنيا وهو كمان مكنش بيستحمل ثانية في غيابي لكن مشكلته أنه كان غيور بشكل صعب وبيعاني من غيرة مرضية علي كل حاجة بيمتلكها وكل شخص بيحبه وكان بيوصل بيه الموضوع أحياناً أنه يقولي " أنتي لو سيبتيني زي ما سيبتي جوزك الأولاني أنا هقتلك وهموت نفسي " لكن كنت فكراه كلام حب ودلع ومعرفش أنه هيطلع فعلاً مريض بالشكل ده ". 

حاول يحرق بنتي عشان يخلص منها 

واختتمت الحديث :" جوزي غيرته وصلت كمان إنه بعد ما وعدني إنه هيعتبر بنتي أكنها بنته بالظبط لقيته في اوقات كتيرة جداً بيغير منها ومن أهتمامي بيها وبيقولي " كان نفسي عيالك يبقوا مني أنا بس ومتبقيش مخلفة من راجل تاني غيري " وكان بيحاول اوقات كتير أنه ياخدها ويوديها لوالدته او والدتي بالأيام لحد ما في مرة كنت في الشغل وسيبت البنت مع جوزي ورجعت لقيت مناطق في جسمها محروقة وبتصرخ وجوزي سايبها في البيت لوحدها ولما سألتها أية اللي عمل فيها كدة قالتلي " بابا مسك المكواة وحطها علي جسمي " وفي اللحظة دي كان هو دخل من باب الشقة وقالي أن المكواة وقعت علي البنت بالغلط وأنه نزل يجيبلها حاجات من الصيدلية  لكن كل ده كدب لأن المكواة محطوطة بحطة الأيد علي جسم البنت وفي مناطق معينة وأنا أكيد هصدق بنتي ومش هصدق راجل ومن بعد الموقف ده وأنا قررت انفصل عن جوزي وارفع عليه دعوى طلاق للضرر لأني مش هستني لما يموت البنت المرة اللي جاية ودي كانت غلطتي أنا أني آمن لراجل غريب علي بنتي وهو مش أبوها ".