«كنت فكراه مهندس و طلع شحات وبيمثل على الناس أنه مريض سرطان».. مأساة زوجة

كنت بفتخر بجوزي في كل مكان وطلع بيشحت من الناس وبيستغلهم .. بتلك الكلمات روت زوجة لتحيا مصر من داخل محكمة الأسرة عن زوجها الذي تقدم لخطبتها واوهمها أنه يعمل بمجال الهندسة وهي سرعان ما وافقت عليه دون تأكد وعاشت معاه لمدة سنة واحدة فقط وأدركت فيها أنه يتسول في الشوارع نهاراً وليلاً ويطلب من الناس مبالغ مادية لتسديد جلسات الكيماوي الخاصة به ويستعطفهم للموافقة فقررت الزوجة رفع عليه قضية طلاق للضرر بمحكمة الأسرة .

جوزي لما طلب أيدي قالنا أنه مهندس ووافقت عليه  

بدأت الزوجة حديثها لتحيا مصر :" أنا خريجة لغات وترجمة وجوزي لما طلب أيدي من سنة قالنا أنه مهندس مدني وكان باين عليه وعلي لبسه وهيئته أنه حد كويس ومحترم ووضعه المادي كويس جدا فبالتالي وافقنا عليه وخلال شهور بسيطة كنا مخطوبين وكتبنا الكتاب لأنه كان جاهز من كل شئ حبيته وهو كمان حبني وعيشت معاه سنة جواز مكنش مخليني محتاجة حاجة بالعكس كان بيديني كل حاجة بسخاء وكرم شديد وكنت بفتخر بيه قدام الناس كلها ".

عرفت من واحدة صاحبتي أن جوزي طلع شحات 

وتابعت الحديث :" في الفترة الأخيرة حصل واكتشفت اللي عمري ما كنت اتمني أنه يحصل أبداً لما واحدة صاحبتي رنت عليا بليل وقالتلي " أنتي أزاي محكيتيليش أن جوزك جاله سرطان ؟" أتخضيت من كلامها وسألتها أية الكلام ده وجابته منين وهي قالتلي أن جوزي قابل جوزها في الشارع ومكنوش يعرفوا بعض وجوزي طلب منه فلوس عشان يسدد بيها جلسات الكيماوي بتاعته وبالتالي جوزها ساعده فعلاً وسابه ومشي وبعدها بحوالي يومين أو تلاتة كانت صحبتي بتتفرج علي صوري مع جوزي علي الفيس وجوزها كان قاعد جنبها ولما شاف الصورة قالها " أنتي تعرفي الراجل ده منين ده قابلني في الشارع وكان محتاج مساعدة عشان عنده السرطان وهي في لحظتها رنت عليا عشان تتأكد من الكلام ده ". 

لما واجهته قالي أنا بعمل كدة عشانك 

واختتمت الزوجة حديثها :" قفلت مع صاحبتي في لحظة ودخلت لجوزي اقوله كل اللي أنا سمعته منها وهو ارتبك جداً وقالي "أنتي عرفتي منين ومين قالك الكلام ده ؟ " لكن أنا هنا كنت بدأت اتأكد أنه مخبي عليا حاجة كبيرة وهددته أنه لو معترفليش وفهمني اللي بيحصل أنا هفضحه في كل حتة راح هو قالي " الكلام ده حقيقي لكن أنا عملت ده عشانك عشان العيشة بقيت صعبة وأي شغل كنت هشتغله مكنش هيدخلي كل المبالغ دي اللي باخدها من الناس " فضلت ابكي بحرقة لما للحظة أستوعبت أن جوزي اللي حبيته طلع بيضحك عليا وعلي الناس كلها طول الفترة دي وأني كنت بفتخر بيه قدام أهلي وهو طلع زيه زي أي حد كنت بقابله في الشارع واعطف عليه روحت المحكمة رفعت عليه دعوي خلع عشان ميسببليش فضيحة من اللي حواليا أكتر من كدة وحمدت ربنا أني مكنتش لسة خلفت منه عيال يربطوني بيه العمر كله ".