هاني رمزي: مقلدتش رامز جلال واتهددت بالقتل من الإخوان

تحدث الفنان هاني رمزي عن سبب عدم نجاح أعماله خلال الفترة الماضية، كما تحدث عن برنامج المقالب الذي كان يقدمه في رمضان وتشابه مع برامج رامز جلال، وكشف رمزي عن التهديدات التي تعرض لها أثناء حكم الأخوان.

تحيا مصر يرصد لكم تصريحات هاني رمزي

وقال هاني رمزي  خلال استضافته في برنامج حبر سري والتي تقدمه الإعلامية أسما إبراهيم ويعرض عبر قناة القاهرة والناس: أخر افلام محققتش إيرادات لان كان لازم يبقى في أداء أكتر من كده.

وتابع: أنا كنت حاببهم بس كان لازم ادقق في حاجات تانية كتير وكنت متخيل ان هما ينجحوا، وفيلم وسطي بيوجعني بحبه وبحب شخصيته لأنها جديدة .

وكشف رمزي: أحيانا بتدخل في الورق وفي السيناريو وأخر فيلمين ليا كان لازم اتدخل أكتر في الورق وده مش سبب فشلهم، وأنا بحاسب نفسي جدًا وأنا حسابي لنفسي أكتر من أي ناقد.

هاني رمزي: في أفكار عندي لا يجوز أني اقدمها في مصر بسبب الممنوعات والقواعد

وتحدث هاني رمزي عن بعض الإيحاءات في أفلامه وخلط الجراة بالكوميديا وقال: احنا تحت ضغط وعندنا ممنوعات كتير جدًا والفنان بيبقى عنده طاقة وخيال وإبداع أنه يحلق من غير تقييد وده بيحد مننا بشكل مش طبيعي.

وكشف: كل الايحاءات كانت اجتهاد شخصي مني ومن السيناريو وبضيف حاجات بس بحذر شديد عشان عايز الناس تشوف الفيلم وميتمنعش.

هاني رمزي: أنا مقلدتش رامز جلال ومش كل واحد عمل برنامج مقالب يبقى بيقلد رامز

وتحدث هاني رمزي عن برامج المقالب التي كان يقدمها وعن اعتقاد البعض أنه يقلد رامز جلال وقال: أنا مقلدتش رامز جلال ومش كل واحد هيعمل برنامج مقالب يبقى بيقلد رامز جلال،  وفي ناس رفضت تعرض الحلقة معايا زي وليد توفيق ودانا حداد.

وأضاف: انا بحب أكبر الممثل اللي هيجي والحلقة تضيف ليه وتكبره مش تقلل منه  وده أسلوبي ويختلف عن رامز.

هاني مزي: قولت لعزت أبو عوف على المقلب قبل ما يجي عشان خوفت عليه

وكشف هاني رمزي:عزت أبو عوف كان تعبان  وكنت عايز اجيبه برنامج هاني في الادغال وقولتله أنا عايزك تيجي برنامج المقالب بتاعي وعرفته عشان خوفت عليه ووافق ومعرفش تفاصيل المقلب ايه.

هاني رمزي: كنت هرشح نفسي لمجلس النواب ورفضت

وتحدث هاني رمزي عن عمل الفنان في السياسة وقال: الفنان لازم يبقى محايد عشان يعرف يعمل كل الأدوار عشان يقدر يجسد كل الشخصيات ولازم تبقى مشاعرك الفنية محايدة جدًا ولو الاتجاهات السياسية وجهتني لفن وادوار معينة ده خطر جدا، وأنا كنت هرشح نفسي لمجلس النواب ورفضت.

وكشف هاني رمزي: كانوا عايزين يعملوا فيلم بيتكلم عن الحقبة اللي حكموا فيها الاخوان مصر ورشحوني في الشخصيات وأنا مكنتش حابب نأرخ الفترة دي ورفضت الدور.

وتابع: اتهددت بالقتل من الأخوان وكان عليا ضغوط كبيرة وكانت فترة صعبة وفكرت اهاجر بره مصر  وخدت إقامة في أمريكا.