كاملة أبو ذكرى: فيلم عن العشق والهوى تجربة قاسية ومبحبش أشوفه

كشفت المخرجة المصرية كاملة أبو ذكري عن كواليس فيلم عن العشق والهوى، وسبب ابتعادها عن السينما لمدة 4 سنوات وذلك خلال تصريحات تليفزيونية.

تحيا مصر يرصد تصريحات كاملة أبو ذكرى.

أبزر تصريحات كاملة أبو ذكرى

قالت كاملة أبو ذكرى: فيلم عن العشق والهوى كان تجربة قاسية جدًا، وقعدت 4 سنين مشتغلش واتقالي عمرك ما هتقفي قدام الكاميرا تاني، ومن الأفلام اللي مش بحب أشوف منها ولا مشهد.

وتابعت: كتبت لماما وأنا عندي 10 سنين إني مخرجة المستقبل، وأبويا قالي عايزة تتجوزي حد يسأل عليكي في الشارع قولتله لأ قالي يبقى طز في الشارع كله، وأمي ساندتني في مشواري.

وسبق وقالت كاملة أبو ذكرى في إحدى الجلسات الحوراية: “مفيش فيلم أحب يكون مسلسل، واللي كنت اتمنى انه يكون فيلم هو واحة الغروب، وصعب الاقي انتاج يتحمس انه يكون فيلم هو نوع واحة الغروب”.

نصيحة كاملة أبو ذكرى للشباب

وتابعت: “النصيحة لـ أي حد نفسه يبقى مخرج لازم الدراسة أهم حاجة، ومشاهدة أفلام العالم كله على قد ما هو يقدر، مهرجان القاهرة فرصة اننا نشوف العالم كله والشغل لو متاح أنا وقفت في اللوكيشن مع مخرجين كبار علموني حاجات كتير وكنت وقتها مساعدة، واشتغلت فيها سنين من أول تدريب لـ مساعد تاني لـ مساعد أول والرحلة كانت مهمة وكانت حافزليا ودلوقتي الدنيا اسهل كتير لأني أقدر امارس ده ”.

كاملة أبو ذكرى تحصد جائزة فاتن حمامة

حصدت كاملة أبو ذكرى على جائزة فاتن حمامة للتميز بمهرجان القاهرة السينمائي الدولي، وقالت عنها: "أنا مش عارفة أقول ايه ده حلم كبير مش مصدقه إنه بيتحقق دي حاجة مكنتش في خيالي، في امتنان وحب من كل الفنانين اللي قابلتهم واللي أمنوا بيا واللي مأمنوش بيا واثروا فيا. واستكملت: مشوار طويل عمري كله قضيته في السينما 16 سنه في عشق وحب والمهرجان كنت بحلم بس ادخله دلوقتي أنا واقفه اتكرم، كل التقدير والامتنان لكل فنان شوفتله فيلم أو مشهد اتعلمت منه حاجه كل فنان اشتغلت معاه وقدملي كتير زي نادرجلال، محمد خان، احمد زكي، نور الشريف وناس كتير قدمتلي دعم ووقفت في ضهري ووصلتني للحظة دي، بشكر بنتي وجوزي بشكرهم عشان تعبوا معايا ومجنناهم وبشكر أمي وابويا اللي لولاهم مكنتش هقف على المسرح هنا.