«مراتي بخيلة» زوج للقاضي: مراتي مش بتجيبلي هدية في عيد ميلادي وبتقولي أنت الراجل وأنت اللي تجيب

مراتي بتاخد مني فلوسي كلها ورغم كدة عمرها ما افتكرتني بهدية ... بتلك الكلمات روي زوج لتحيا مصر داخل محكمة الأسرة عن زوجته التي لا تشعره بإهتمامها به بل تريد أن تأخذ هي كل الأهتمام سواء المادي او المعنوي فهي تعتقد أن المرأة ليس من واجباتها مع الرجل أن تكون معطاءة وكريمة بل هي تري أن الرجل فقط هو المطالب بهذا الدور .

أهل مراتي ربوها أنها تاخد بس ومتديش

بدأ الزوج حديثه لتحيا مصر :" أنا ومراتي متجوزين من 15 سنة وعندنا طفلين جوازنا كان تقليدي لكن أنا حبيتها بعد الجواز وكنت بتمنالها الرضا ترضا وهي كانت في المجمل زوجة مثالية وبتهتم بنفسها وببيتها وبيا وبالاولاد ومش مقصرة في شئ لكن كان عندها عيب كبير وهو أن أهلها ربوها علي أنها تاخد بس من اللي حواليها ومتديش لأن اللي في أيدها ده ملكها هي وبس وكنت بلاحظ ده من أيام الخطوبة لكن كنت فاكر أنها بعد الجواز هتتغير للأفضل واللي حصل عكس كدة ".

بتقولي أنت الراجل وأنا الست 

وتابع الزوج حديثه :" أنا بفضل ربنا مرتاح في شغلي ومخلي مراتي وعيالي مش محتاجين ولا محرومين من حاجة ومراتي قبل ما تطلب الحاجة بتبقي عندها سواء مصاريف بيت او حتي هدايا من النوع الغالي واللي هي بتحبها لكن بالرغم من كدة عمرها ما أفتكرتني بهدية حتي لو بسيطة تحسسني بحبها ليا حتي في عيد ميلادي والدتي ووالدي هما بس اللي بيشترولي هدايا وهي لا ولما مؤخراً بقيت اواجهها بالقصة دي واقولها " أنتي ليه عمرك ما فكرتي تفرحينة بهدية حتي لو بسيطة زي ما كل الستات بتعمل ما رجالتها ... هو أنا مخليكي ناقصك حاجة ؟" الاقيها بترد عليا بكل جفي وتقولي " علي فكرة أنت الراجل وأنا الست يعني أنت اللي المفروض تجيبلي مش أنا ".

عيالي مش عارفين يحبوا أمهم بسبب بخلها عليهم 

واختتم الزوج حديثه :" مراتي مش بخيلة عليا أنا بس دي بخيلة كمان علي عيالها اللي بقوا في سن المراهقة  ومحتاجين يحسوا بالأهتمام والعطاء من أبوهم وأمهم لكن هي زي ما بتعمل معايا بتعمل معاهم بالظبط ومش بتهتم غير بمصاريفهم وأحتياجاتهم الأساسية والمعيشية لكن لما بينجحوا في الأمتحانات او لما بتيجي مناسبة مش بتعبرهم وده مخليهم مش قريبين منها وحاسين بالنقص طول الوقت ولما بيتكملوا معاها بتقولهم " مش كفاية بأكلكم وبشربكم وبخدمكم طول الوقت " آخر ما تعبت منها وحسيت أن نفسية أولادي متأثرة بسببها طلقتها وهي حتي بعد ما انفصلنا برضه مش شبعانة فلوس ورافعة عليا دعوي نفقة وأنا هديها اللي هي عايزاه مقابل أني ارتاح منها وربنا يعوض عليا بواحدة أصيلة تبقي بتفكر في سعادتي ومش بتبخل عليا في حاجة ".